Uday Samant Video : ‘छावा’ सिनेमातील ‘तो’ सीन अखेर काढला; मंत्री उदय सामंत माहिती देताना म्हणाले; ‘सकारात्मक गोष्ट म्हणजे…’

दिग्दर्शकांनी छावा चित्रपटातील नाचण्याचा भाग काढून टाकला, अशी माहिती शिवसेनेचे नेते, मंत्री उदय सामंत यांनी माहिती दिली. छावा चित्रपटातील नृत्य दाखवल्यावरुन झालेला वाद आता थांबला असावा, अशी अपेक्षाही उदय सामंत यांनी व्यक्त केली आहे. “मी स्वत: चित्रपटाच्या दिग्दर्शकांना फोन केला होता. त्यानंतर घडलेली सकारात्मक गोष्ट म्हणजे चित्रपटातील नाचण्याचा भाग त्यांनी काढून टाकला आहे”, असं उदय सामंत म्हणाले. तर धर्मरक्षक,स्वराज्यरक्षक छत्रपती संभाजी महाराज यांच्या जीवनावर आधारित हिंदी चित्रपट बनणे ही आनंदाची गोष्ट आहे, छत्रपतींचा इतिहास जगाला समजावा यासाठी असे प्रयत्न आवश्यक आहे. मात्र या चित्रपटात काही आक्षेपार्ह दृश्ये असल्याबाबत अनेकांनी मते व्यक्त केली आहेत. हा चित्रपट तज्ज्ञ आणि जाणकारांना आधी दाखवण्यात यावा त्याशिवाय प्रदर्शित करू नये अशी आमची भूमिका आहे. महाराजांच्या सन्मानाला बाधा पोहोचेल अशी कुठलीही गोष्ट खपवून घेतली जाणार नाही, असं उदय सामंत यांनी काल ट्वीटच्या माध्यमातून म्हटलं होते. तर चित्रपटाच्या निर्माते आणि दिग्दर्शकांनी तातडीने या बाबत उपाययोजना करून आक्षेपार्ह काही असेल तर काढून टाकलं पाहिजे अशी आमची भूमिका आहे. चित्रपट पाहून पुढील निर्णय घेतला जाईल, त्याशिवाय हा चित्रपट प्रदर्शित होऊ देणार नाही, असा इशाराही त्यांनी दिला होता. छावा चित्रपटात संभाजीराजे हे लेझिमवर नृत्य करताना दिसले आहेत. लेझिम खेळताना दाखविणं चुकीचं नाही, पण ते लेझिमवर नृत्य करताना दाखविले आहेत. अखेर हा सीन चित्रपटातून काढून टाकण्यात आलाय.