निवडणूक आयोगात दम असेल तर…; उद्धव ठाकरेंचं आयोगाला थेट आव्हान

उद्धव ठाकरे यांनी निवडणूक आयोगावर जोरदार टीका केली असून, बिनविरोध निवडणुका रद्द करण्याची आणि राहुल नार्वेकर यांना विधानसभा अध्यक्षपदावरून निलंबित करण्याची मागणी केली आहे. जर निवडणूक आयोगाने बिनविरोध निवडणुका रद्द करून पुनर्निवडणुका घेतल्या नाहीत, तर जनतेमध्ये त्यांचा सत्ताधाऱ्यांचे गुलाम असा समज होईल, असे ठाकरे म्हणाले. पश्चिम बंगालमधील बिनविरोध निवडणुकांवर भाजपनेच सर्वोच्च न्यायालयात धाव घेतल्याची आठवण त्यांनी करून दिली.

ठाकरे यांनी राहुल नार्वेकर यांच्यावर गुन्हा दाखल करून त्यांना निलंबित करण्याची मागणी केली. तसेच, मुंबईतील विकासकामांचे श्रेय घेण्यावरूनही त्यांनी सत्ताधाऱ्यांवर शरसंधान साधले. कोस्टल रोड, मध्य वैतरणा धरण, कोरोना काळातील कामे आणि शिवस्मारकाचा पुतळा यांसारख्या कामांचे श्रेय आमचे असून, ते मिंधे सरकार घेण्याचा प्रयत्न करत आहे, असा आरोप त्यांनी केला. मोदीजींनी कैलास पर्वत बांधला किंवा स्वर्गातून गंगा आणली, असे मोठे काम त्यांनी सांगावे, असा टोलाही त्यांनी लगावला.