तुम्ही नवीन कार घेतली आहे का? मग डिलिव्हरीपूर्वीच या गोष्टी तपासून घ्या

कार घेण्याचं स्वप्न पूर्ण झालं की आनंद गगनात मावेनासा होतो. काय करू आणि काय नको असं होतं. घरातील नव्या पाहुण्याप्रमाणे गाडीचं स्वागत केलं जातं. कारण गाडी घेणं हे सर्वांनाच शक्य होतं असं नाही. त्यामुळे गाडी दारात आली की एक वेगळाच रुबाब असतो. त्यामुळे गाडीला जरा जरी काय झालं तर चिडचिड होते. विचार करा नवीन गाडी दारात उभी राहण्यापूर्वीत असं काही झालं तर… असं होऊ नये असं वाटत असेल तर काही गोष्टींची काळजी घेणं गरजेचं आहे. गाडी घेतल्यानंतर डिलिव्हरी वेळी काही गोष्टी तपासणं आवश्यक आहे. त्यामुळे तिथल्या तिथेच कार डिलिव्हरी कंपनीला याबाबत सूचना देता येईल आणि पुढील मोठी समस्या टाळता येईल. जर तुम्हीही नवीन कार घेतली असेल तर गाडी दारात आणण्यापूर्वीच पाच गोष्टी तपासून घ्या.

गाडीची बाह्य तपासणी: कारच्या बाह्य भागाचे काळजीपूर्वक तपासणी करा. बॉडी पॅनल्स कोणताही डेन्ट आहे की नाही ते चेक करा. पॅनेलमधील गॅपही तपासून घ्या. गाडीचा रंग व्यवस्थित आहे की नाही तेही बघून घ्या. रंगात कुठे गडबड तर नाही ना.. हलका रंग किंवा जाड थर तर मारला नाही एकदा हात लावून तपासून घ्या. जाड थर असेल तर काही दिवसांनी रंगाचा पापुद्रा निघू शकतो. पातळ रंग लावला असेल तर तो रंग उडू शकतो. चाकांची तपासणी करता ते घासलेले तर नाही हे बघा. क्रॅक वैगैरे आहेत की नाही ते बघा.

गाडीची अंतर्गत तपासणी : गाडी बाहेरून व्यवस्थितरित्या बघून झाली की आतल्या बाजूने तपासणी करा. डॅशबोर्ड आणि उपकरणे व्यवस्थित आहे की नाहीत याची पडताळणी करा. डिस्प्ले व्यवस्थित दिसतोय की नाही. गाडीतील सीट्स व्यवस्थित आहेत की नाही. इतकंच काय तर ऑडिओ, ब्लूटूथ कनेक्टिव्हिटी आणि नेव्हिगेशन व्यवस्थित दाखवतंय की नाही ते बघा. आत कसला विचित्र वास किंवा कसले डाग वगैरे नाही ते तपासा.

इंजिन आणि परफॉर्मेन्स : इंजिन ऑइल, कूलंट, ब्रेक, ट्रान्समिशन एकदा तपासून घ्याल. इंजिन ऑईल जुनं नाही ना हे रंगावरून तपासू शकता. बॅटरीला गंज वगैरे चढला नाही ना, बॅटरी सुस्थितीत आहे की नाही याची चाचपणी करा. गाडी सुरु करताना विचित्र आवाज तर येत नाही ना किंवा अधिक वायब्रेशन होत असेल तर लगेच संबंधित डिलिव्हरी कंपनीला सांगा. गाडी चालवाताना गिअर व्यवस्थित पडतो की नाही तसेच गिअर शिफ्टिंगला त्रास होत नाही तेही बघून घ्याल.

ओडोमीटर आणि इंधन : नवीन घेतलेल्या गाडीचे ओडोमीटर रीडिंग 100 ते 150 किमीच्या वर नसावं. जर असं दिसून आल्यास डीलरकडे स्पष्टीकरण मागा. डिलर्स सामन्यत: पाच लिटर मोफत इंधन देतात. त्यामुळे हे इंधन जवळच्या पेट्रोल पंपपर्यतं पोहोचण्यास पुरेसे आहे की नाही याची खात्री करून घ्या.

गाडीची कागदपत्रं : गाडी दारात आणण्यापूर्वी सर्व कागदपत्र नीट तपासून घ्या. कारण यात अटी आणि गाडीच्या पार्टसची वॉरंटी असते. मॅन्युअल एकदा तपासून घ्या. वॉरंटीच्या अटी, कालावधी आणि मायलेज तपासून घ्या. सर्व्हिस कधीपर्यंत मोफत आहे याबाबत जाणून घ्या. तुमच्या नावावर वाहनाची नोंद झाली आहे की नाही तसेच विमा काढला की नाही हे बघून घ्या.