Budget 2023 : अर्थसंकल्प मध्ये निर्मला सीतारमण यांनी ‘सप्तर्षी’ कशाला म्हंटलय, मोदी सरकारची सप्तर्षी काय असणार?

मोदी सरकारच्या दुसऱ्या टर्मचं शेवटचा आणि अर्थमंत्री निर्मला सीतारमण यांचा पाचवा अर्थसंकल्प आज सादर करण्यात आला. यामध्ये अर्थमंत्री निर्मला सीतारमण यांनी सप्तर्षीच्या माध्यमातून अर्थसंकल्प सादर केला आहे.

Image Credit source: Google

Kiran Balasaheb Tajne | Updated on: Feb 01, 2023 | 12:59 PM

नवी दिल्ली : मोदी सरकारच्या दुसऱ्या टर्मचं शेवटचा अर्थसंकल्प आज अर्थमंत्री निर्मला सीतारमण यांनी सादर केला आहे. यामध्ये निर्मला सीतारमण यांनी अर्थसंकल्प सादर करत असतांना आगामी काळातील निवडणुकीच्या पार्श्वभूमीवर संपूर्ण देशवासीयांना खुश करण्याचा प्रयत्न केला आहे. यामध्ये अर्थसंकल्पातील मुख्य सात उद्दिष्टांना अर्थमंत्री निर्मला सीतारमण यांनी ‘सप्तर्षी’ असे म्हंटले आहे. अर्थसंकल्पातील सप्तर्षी म्हणजेच सर्वसमावेशक वाढ, वंचितांना प्राधान्य, पायाभूत सुविधा आणि गुंतवणूक, क्षमता विस्तार, हरित वाढ, युवा शक्ती, वित्तीय क्षेत्र या सात बाबींचा समावेश आहे. अर्थसंकल्प सादर करत असतांना ही सप्तर्षी समोर ठेऊन अर्थसंकल्प सादर केला जाणार असल्याचे आपल्या भाषणात निर्मला सीतारमण यांनी सांगत मोठ्या घोषणा केल्या आहेत.

निर्मला सीतारमण यांनी शेतकाऱ्यांसह उद्योजक, नोकरदार आणि वंचित घटकांना प्राध्यान्य दिलं आहे. यामध्ये 7 लाखांपर्यंत उत्पन्न असलेल्या व्यक्तींना कर नसणार आहे.

गरिबांना रेशन मोफत मिळणार असल्याची घोषणा केली आहे. यामध्ये कोरोना काळात सुरू केलेली मोफत रेशन मिळण्याची सुविधा आता वर्षभर सुरू राहणार आहे.

महिलांचे आर्थिक सबलीकरण, बचत गटाच्या माध्यमातून ग्रामीण महिलांचा विकास करण्याबरोबर शेतकऱ्यांसाठी डिजीटल प्लॅटफॉर्म उभारणार असल्याचीही घोषणा करण्यात आली आहे.

ग्रीन ग्रोथच्या माध्यमातून रोजगार निर्मितीवर भर देण्यात येणार आहे. तसेच कापूस शेती करतांना जास्तीत जास्त नफा मिळेल यासाठी विशेष लक्ष दिले जाणार आहे.

डाळी उत्पादन झाल्यानंतर त्यासाठी विशेष हब तयार केले जाणार आहे. याशिवाय पर्यावरण संवधर्नसाठी विशेष प्रयत्न केले जाणार आहे. याशिवाय रेल्वेचे बजेटही 2013 च्या तुलनेत 9 पटीनं वाढविण्यात आले आहे.

देशातील मोबाइल फोन, कॅमेरा लेन्स आणि बॅटरी यांच्या किमती कमी होणार असून आयात शुल्कमध्ये कपात करण्यात आली आहे. त्यामुळे मोबाइलच्या किमतीत मोठा फरक होणार आहे.

आदिवासी विकास मिशनच्या माध्यमातून आदिवासी विभागात विशेष लक्ष अर्थसंकल्पात देण्यात आली आहे. याशिवाय 16 हजाराहून अधिक शिक्षकांची नियुक्ती केली जाणार आहे.

आदिवासी विकास मिशनद्वारे एकलव्य निवासी शाळा योजना राबविली जाणार असून त्याच्या माध्यमातून आदिवासी विद्यार्थ्यांना शिक्षण देण्याचा विचार केंद्र सरकारने दिला आहे.

अर्थसंकल्पात गरीब कैद्यांच्या जामिनासाठी आर्थिक मदत केली जाणार असल्याची घोषणाही अर्थमंत्री निर्मला सीतारमण यांनी केली आहे. त्यामुळे सर्वसामान्य जनतेला आणि आगामी काळातील निवडणुका बघता अर्थसंकल्प खुश करणारा ठरला आहे.