Bisleri IPL : विक्रीची चर्चा पडली मागे, या IPL टीमशी केली मोठी डील

नवी दिल्ली : बाटलीबंद पाण्याची तडाख्यात विक्री करणाऱ्या बिसलेरी (Bisleri) कंपनी विक्रीच्या हालचाली आता मंदावल्या आहेत. आयपीएलमध्ये या टीमसोबत (IPL 2023) बिसलेरीची चर्चा रंगली आहे. आयपीएलमधील टीमसोबत बिसलेरीने करार केला आहे. एक दोन महिन्यांपूर्वी बिसलेरी विक्रीची चर्चा रंगली होती. टाटा समूह ही कंपनी खरेदी करणार असल्याचे समोर आले होते. बिसलेरीचे मालक रमेश चौहान (Ramesh Chauhan) यांनी त्यांच्याकडे व्यवसाय संभाळण्यासाठी उत्ताराधिकारी नसल्याने कंपनी विक्रीची घोषणा केली होती. टाटासोबत करार जवळपास अंतिम टप्प्यात होता. पण कुठेतरी माशी शिंकली आणि विक्रीची प्रक्रिया थंडबस्त्यात पडली.

रमेश चौहान यांची एकुलती एक राजकन्या जयंती चौहान हिने बिसलेरीची कारभार हाती घेण्यास अनुत्साह दाखविल्याने कंपनीची विक्री करण्यात येत होती. पण आता जयंतीने या व्यवसायात लक्ष घालण्यास सुरुवात केल्याचे वृत्त आहे. तिच्याच सक्रियेतेमुळे आयपीएलच्या टीमसोबत बिसलेरीने करार केल्याचे समोर आले आहे. बिसलेरी इंटरनॅशनलच्या उपाध्यक्ष जयंती चौहान (Jayanti Chauhan) यांच्या नेतृत्वात कंपनीने मोठी पाऊलं टाकली आणि सर्वांच्या भुवया उंचावल्या.

जयंती चौहान हिने आयपीएलमधील टीम दिल्ली कॅपिटल्स (Delhi Capitals) सोबत हा करार केला. बिसलेरी आणि दिल्ली कॅपिटल्स याची भागीदार झाली. हा करार येत्या तीन वर्षांसाठी असेल. म्हणजे पुढील तीन वर्षांसाठी बिसलेरी दिल्ली कॅपिटल्सची हायड्रेशन पार्टनर असेल. यापूर्वी मुंबई इंडियन्स (Mumbai Indians) आणि गुजरात टायटन्स (Gujrat Titans) सोबत बिसलेरीची पार्टनरशिप होती. जयंती चौहान हिने या कराराविषयी आनंद व्यक्त केला.

बिसलेरी हा ब्रँड जयंतीलाल चौहान (Jayantilal Chauhan) यांच्या मालकीचा आहे. त्यांनी 1984 साली सीलबंद पाण्याचा हा व्यवसाय सुरु केला होता. सध्याचे संचालक रमेश जे चौहान (Ramesh J Chauhan) यांचे वय 82 वर्ष आहे. बाटलीबंद मिनरल वॉटर मार्केटमध्ये बिसलेरीचा दबदबा आहे. बिसलेरीचा भारतीय बाजारात 60 टक्के वाटा आहे.

बिसलेरीच्या संकेतस्थळानुसार, जयंतीलाल चौहान यांनी 1949 मध्ये सॉफ्ट ड्रिंक्स तयार करणारी पारले समूहाची स्थापना केली होती. त्यांनी 1969 मध्ये इटलीतील एका उद्योजकाकडून बिसलेरी खरेदी केली होती. सध्या कंपनी हँड सॅनिटायझरही तयार करत आहे. Bisleriचे 128 हून अधिक ऑपरेशनल प्लॅँट आहेत. कंपनीचे 6000 अधिक वितरक आणि 7500 हून अधिक ट्रकसोबत नेटवर्क आहे. इतर देशातही व्यवसायाचा पसारा पसरला आहे. आता बिसलेरीने आयपीएलमधील टीम दिल्ली कॅपिटल्स सोबत व्यावसायिक करार केला आहे.