100 कोटी पगार, Ratan Tata यांचा उजवा हात, कोण आहे ही व्यक्ती?

नवी दिल्ली | 14 February 2024 : रतन टाटा यांचे अगदी जवळचे सहकारी, त्यांचे राईट हँड, एन चंद्रशेखरन (N Chandrasekaran) हे टाटा समूहाचे जबाबदारी संभाळत आहेत. गेल्या सात वर्षांपासून देशातील सर्वात मोठ्या उद्योग समूहांपैकी एक टाटा समूहाची कमान त्यांच्या हाती आहे. रतन टाटा त्यांच्यावर विश्वास टाकतात. त्यावर ते खरे उतरले आहे. त्यांनी या समूहाच्या प्रगतीला मोठा हातभार लावला. टाटा कंपनीने त्यांच्या नेतृत्वात 128 अब्ज डॉलरची झेप घेतली. टाटा आणि सायरस मिस्त्री वादानंतर चंद्रशेखरन यांना टाटा सन्सचे चेअरमन बनविण्यात आले होते.

100 कोटींहून अधिक पगार

चंद्रशेखरन यांच्या पत्नीचे नाव ललिता आहे. त्यांच्या मुलाचे नाव प्रणव चंद्रशेखरन आहे. एन चंद्रशेखरन यांच्याकडे आलिशान बंगला आहे. त्यांनी तो 2020 मध्ये 98 कोटी रुपयांना खरेदी केला होता. मुंबईतील पेड्डर रोडवर त्यांनी हा बंगला खरेदी केला होता. त्यांच्या पगारात घसघशीत वाढ करण्यात आली आहे. सध्या त्यांचे वेतन 100 कोटी रुपयांहून अधिक असल्याचे सांगण्यात येते.

टाटा समूहाने घेतली मोठी झेप

मीडिया रिपोर्ट्सनुसार, चंद्रशेखरन यांचा पगार 2019 मध्ये 65 कोटी रुपये वार्षिक इतका होता. 2021-22 मध्ये तो वाढून 109 कोटी रुपये करण्यात आला होता. या कालावधीत देशातील सर्वाधिक पगार त्यांनी घेतला. त्यांच्या नेतृत्वात टाटा समूहाने मोठी झेप घेतली. 2022 मध्ये त्यांनी 64,267 कोटी रुपयांपर्यंत नफा वाढवला. तर 2017 मध्ये नफ्याचा आकडा 36,728 कोटी रुपये होता. या पाच वर्षांत टाटा समूहाचा महसूल 6.37 लाख कोटी रुपयांहून वाढून 9.44 लाख कोटी रुपये इतका झाला.

प्रशिक्षणार्थी ते सीईओ

चंद्रशेखरन यांनी त्यांचे शिक्षण पूर्ण झाल्यावर 1987 मध्ये इंटर्न म्हणून टाटा कन्सल्टेन्सीमध्ये नोकरी केली. पुढील दोन दशकात त्यांनी मेहनत आणि बुद्धिमतेची चुणूक दाखवली. त्यांना 2007 मध्ये टीसीएस बोर्डात सहभागी करुन घेण्यात आले. तसेच त्यांना चीफ ऑपरेटिंग ऑफिसर करण्यात आले. त्यानंतर 2009 मध्ये 46 व्या वर्षी ते टीसीएसचे सीईओ झाले. ते टाटा समूहातील सर्वात तरुण सीईओ आहेत. ते फिटनेस बाबत जागरुक आहेत. त्यांनी अनेक मॅरेथॉन आणि हाफ मॅरेथॉनमध्ये पण सहभाग घेतला आहे. तामिळनाडूतील एका शेतकरी कुटुंबात 1963 मध्ये त्यांचा जन्म झाला.