Gold Silver Rate: सोनं-चांदीच्या दरांमध्ये मोठी उलथापालथ, किमती वाढल्या की कमी झाल्या? पाहा दर

21 जुलै 2026 रोजी देशांतर्गत सराफा बाजारात सोने आणि चांदीच्या किमती मजबूत झाल्या. सर्वसामान्यांना काही दिलासा मिळालेला नाही. आता सणसुदीचे दिवस सुरु होणार आहेत आता या दिवसांत लोक सोनं आणि चांदी खरेदी करतात, सणासुदीला दागिने खरेदी करणं हे शुभ मानले जाते, यादृष्टीने आता सोन्याच्या आणि चांदीच्या किमती वाढताना दिसत आहे. आंतरराष्ट्रीय बाजारातील चढ-उतार, डॉलरची हालचाल आणि गुंतवणूकदारांची वाढलेली खरेदी यांचा परिणाम भारतीय बाजारात स्पष्टपणे दिसून आला. प्रमुख शहरांमध्ये 22-कॅरेट आणि 24- कॅरेट सोन्याच्या किमती वाढल्या, तर चांदीचा व्यापारही उच्च पातळीवर झाला. आंतरराष्ट्रीय बाजार कॉमेक्समध्ये सोने आणि चांदी या दोन्हींच्या किमती वाढल्या आहेत. आकडेवारीनुसार, सोन्याचा भाव सुमारे 0.70 % ने वाढून प्रति औंस $ 4044.10 वर पोहोचला आहे. चांदीच्या किमतीही वाढल्या आहेत. चांदीचा भाव 1.51 % ने वाढून प्रति औंस $57.935 वर व्यवहार करत आहे.

एमसीएक्सवरील भाव किती? भारताच्या देशांतर्गत एमसीएक्समध्येही सोन्याच्या किमती वाढल्या आहेत. सकाळी 9 वाजता, एमसीएक्सवर सोन्याचा भाव  0.70 % ने वाढून प्रति 10 ग्रॅम सुमारे ₹ 1,42,250 वर व्यवहार करत होता. अलीकडील चढ-उतारानंतर, किमती आता वाढीचा कल दर्शवत आहेत. दरम्यान, भारतात चांदीच्या दरात मोठी वाढ झाली आहे. मागील दिवसांच्या तुलनेत सुमारे 1.11% वाढ होऊन चांदीचा भाव प्रति किलोग्राम ₹ 2,20,830च्या आसपास पोहोचला आहे.

शहरांमधील दर किती?  आज, मंगळवार, 21 जुलै 2026 रोजी, देशातील प्रमुख शहरांमध्ये 24-कॅरेट सोन्याचा भाव प्रति 10 ग्रॅम ₹1.42 ते ₹ 1.43 लाखांच्या आसपास आहे, तर  22-कॅरेट सोन्याचा भाव सुमारे ₹ 1.31 लाख आहे. 18-कॅरेट सोन्याचा भावही सुमारे ₹1.07 लाख आहे. चांदीचा भाव प्रति किलोग्राम सुमारे ₹2.21 लाख होता.

कच्च्या तेलाच्या किमतीतील चढ-उतारामुळे सोने आणि चांदीच्या किमतीतही लक्षणीय चढ-उतार होत आहे. गेल्या काही दिवसांपासून सातत्याने घसरण झाल्यानंतर, कालपासून वाढ सुरू झाली आहे. जर तुम्ही लग्नासाठी, विशेष प्रसंगासाठी किंवा दीर्घ मुदतीसाठी सोने आणि चांदी खरेदी करण्याचा विचार करत असाल, तर बाजारावर लक्ष ठेवा. खरेदी करण्यापूर्वी बीआयएस (BIS) हॉलमार्क नक्की तपासा.