Gold Price : सोन्याची गरुड भरारी, लवकरच किंमती मोडणार सर्व विक्रम? वायदे बाजारात उच्चांकी झेप, काय आहे आजचा भाव

नवी दिल्ली : भारतीय वायदे बाजारात (Multi Commodity Exchange-MCX) आज सोने आणि चांदीच्या भावात जोरदार उसळी दिसून आली. वायदे बाजारात चांदीचा भाव आज 70,000 रुपये प्रति किलोपेक्षाही अधिक होता. मंगळवारी 3 जानेवारी रोजी मल्टी कमोडिटी एक्सचेंजवर सोन्याच्या भावात (Gold Price Today) 0.67 टक्क्यांची वृद्धी दिसून आली. तर चांदीचा भाव (Silver price Today) आज 1.41 टक्क्यांनी वधारला. गेल्या व्यापारी सत्रात MCX वर सोन्याचा दर 0.28 टक्क्यांच्या वृद्धीसह बंद झाला होता. तर चांदीच्या भावात 0.21 टक्क्यांची वाढ झाली होती.

मंगळवारी वायदे बाजारात 24 कॅरेट शुद्ध सोन्याचा भाव (Gold Rate Today) सकाळी 09:15 वाजता कालच्या भावापेक्षा 315 रुपयांनी वधारला. आज सोन्याचा भाव 55,550 रुपये प्रति 10 ग्रॅमवर व्यापार करत होता. त्यामुळे सोने येत्या काही दिवसात गरुड भरारी घेण्याची शक्यता आहे.

आज सुरुवातीच्या व्यापारी सत्रात भाव 55,280 रुपये होते. गेल्या व्यापारी सत्रात, म्हणजे काल MCX वर सोन्यात 156 रुपयांची वाढ दिसून आली. सोन्याचा भाव काल 55,170 रुपयांवर प्रति 10 ग्रॅमवर व्यापार करत होता. त्यानंतर आज बाजार उघडला तेव्हा त्यात वाढ दिसून आली.

मल्‍टी कमोडिटी एक्‍सचेंज (MCX) वर आज चांदीचा दर ही वधारला. चांदीचा भाव (Silver rate Today) 979 रुपयांनी वाढला आणि 70,550 रुपये प्रति किलोग्रॅम झाला. चांदीचा आजचा भाव 69,850 रुपयांवर उघडला. त्यानंतर भाव 70,990 रुपयांपर्यंत वधारला.

आंतरराष्ट्रीय बाजारात आज सोने आणि चांदीत तेजी दिसून आली. सोन्याचा आजच्या भावात 0.97 टक्क्यांची वाढ दिसून आली. सोने 1,841.39 डॉलर प्रति औस झाले. तर आंतरराष्ट्रीय बाजारात चांदीने आगेकूच केली. चांदीच्या भावात आज 1.68 टक्क्यांची वाढ होऊन ती 24.37 डॉलर प्रति औसवर व्यापार करत होती.

दिल्ली सराफा बाजारात सोन्याच्या किंमतीत मंगळवारी जोरदार वाढ दिसून आली. तर चांदीची किंमत घसरली. सोन्याच्या भावात 154 रुपयांची वाढ झाली. 10 ग्रॅम सोन्यासाठी 55,397 रुपये मोजावे लागले. तर काल सोन्याचा भाव 55,243 रुपये प्रति 10 ग्रॅम होता. चांदीत प्रति किलो 17 रुपयांची घसरण दिसून आली. चांदीचा भाव 69,831 रुपये प्रति किलोग्रॅम होता.