Gold Silver Rate Today 21 August 2024 : सोने वधारले, तर चांदीने पण घेतली उसळी, आता काय आहेत किंमती? इतकी बसली खिशाला झळ

सोने आणि चांदीने ग्राहकांना आठवड्याच्या तिसऱ्या दिवशी झटका दिला. भावात मोठी वाढ झाली. मंगळवारी सोन्यात घसरण झाली होती. गेल्या आठवड्यात एक दिवसाच्या गॅपनंतर सोने 600 रुपयांनी तर चांदी 4 हजारांनी उसळली होती. रक्षाबंधनाअगोदर भाव वधारले होते. तर या आठवड्यात मौल्यवान धातूच्या किंमतीत चढउताराचे सत्र दिसत आहे. आता असा आहे बेशकिंमती धातूचा भाव (Gold Silver Price Today 21 August 2024 )

सोने 500 रुपयांनी वधारले

गेल्या आठवड्यात सोन्याने मोठी भरारी घेतली होती. या आठवड्याच्या सुरुवातीलासोमवारी किंमतीत कोणताही बदल झाला नाही. मंगळवारी सोन्याच्या दरात 120 रुपयांनी घसरण झाली. तर 21 ऑगस्ट रोजी बुधवारी सोने 550 रुपयांनी वधारले. गुडरिटर्न्सनुसार, आता 22 कॅरेट सोने 67,250 रुपये प्रति 10 ग्रॅम तर 24 कॅरेट सोन्याचा भाव 73,350 रुपये प्रति 10 ग्रॅम आहे.

चांदीची 1 हजारांची झेप

गेल्या आठवड्यात चांदीने 4,000 रुपयांची झेप घेतली होती. तर या आठवड्यात सुरुवातीला चांदीत सुस्तावली होती. मंगळवारी चांदी 1,000 रुपयांनी वधारली. तर आज किंमतीत कोणताच बदल झाला नाही. गुडरिटर्न्सनुसार, एक किलो चांदीचा भाव 87,000 रुपये आहे.

14 ते 24 कॅरेटचा भाव काय

इंडियन बुलियन्स अँड ज्वेलर्स असोसिएशननुसार (IBJA), 24 कॅरेट सोने 71,945, 23 कॅरेट 71,657, 22 कॅरेट सोने 65,902 रुपयांवर घसरले. 18 कॅरेट आता 53,959 रुपये, 14 कॅरेट सोने 42,088 रुपये प्रति 10 ग्रॅमवर आहे. एक किलो चांदीचा भाव 85,321 रुपये इतका झाला. वायदे बाजारात आणि आंतरराष्ट्रीय बाजारात सोने आणि चांदीवर कुठलाही कर, शुल्क नसते. तर सराफा बाजारात शुल्क आणि कराचा समावेश होत असल्याने भावात तफावत दिसून येते.

घरबसल्या जाणून घ्या भाव

सोने-चांदीच्या किंमती तुम्हाला घरबसल्या पण जाणून घेता येईल. सोने-चांदीचे ताजे भाव जाणून घेता येईल. त्यात स्थानिक कर, इतर करांचा भर पडतो. त्यामुळे शहरानुसार किंमतीत तफावत दिसून येते. इंडियन बुलियन्स अँड ज्वेलर्स असोसिएशन (IBJA) हे भाव जाहीर करेल. केंद्र सरकारने जाहीर केलेल्या सुट्या, शनिवारी आणि रविवार हे दिवस सोडून या किंमती जाहीर करण्यात येतात. ग्राहक 8955664433 या क्रमांकावर मिस्ड कॉल देऊन सर्व कॅरेटचे भाव जाणून घेऊ शकतात.