Gratuity Calculator: ग्रॅच्युइटी म्हणजे काय? जर तुमचा पगार 30 हजार असेल तर एका वर्षात किती रक्कम मिळेल? वाचा…

Gratuity Calculator : तुम्ही एखाद्या संस्थेत काम करत असाल आणि तुमचे पीएफ खाते असेल तर तुम्हाला ईपीएफमधून अनेक फायदे मिळू शकतात. तुम्ही नोकरी करत असताना तुमचा पीएफ दरमहा कापला जातो आणि पीएफ खात्यात जमा केला जातो. तुमच्या गरजेनुसार तुम्ही यातून पैसे काढू शकता. तुम्ही निवृत्तीनंतर पूर्णपणे याचा लाभ घेऊ शकता. ज्यांच्याकडे पीएफ खाते आहे त्यांना त्यांच्या सेवेनुसार निवृत्तीनंतर ईपीएस पेन्शन देखील मिळते. तसेच कर्मचाऱ्यांना ग्रॅच्युइटी देखील मिळते. तुम्ही कंपनीत किमान 5 वर्षे काम केले असेल आणि नंतर ते सोडले असेल किंवा निवृत्त झाला असाल तरीही तुम्हाला हा ग्रॅच्युइटी लाभ मिळू शकतो. याचा फायदा सरकारी कर्मचाऱ्यांना तसेच खाजगी क्षेत्रातील कर्मचाऱ्यांनाही होतो. ग्रॅच्युइटी म्हणजे नेमके काय? ते कसे मोजले जाते? याबाबतच्या सर्व प्रश्नांची माहिती जाणून घेऊयात.

ग्रॅच्युइटी म्हणजे काय?

ग्रॅच्युइटी म्हणजे सलग 5 वर्षे किंवा त्याहून अधिक काळ सेवा बजावल्यानंतर, नोकरी सोडताना किंवा निवृत्तीवेळी कंपनीकडून मिळणारी ‘एकरकमी’ बक्षीस रक्कम होय. ही ग्रॅच्युइटी सामान्यतः फक्त पाच किंवा त्याहून अधिक वर्षे सेवा पूर्ण केलेल्यांनाच दिली जाते. ही पेमेंट पेमेंट ऑफ ग्रॅच्युइटी कायदा, 1972 अंतर्गत दिली जाते. अपघात किंवा आजारामुळे अपंगत्व आल्यास कर्मचाऱ्यांना लवकर ग्रॅच्युइटी मिळू शकते. ही रक्कम त्यांना मिळालेल्या शेवटच्या पगारावर आणि सेवेच्या वर्षांवर आधारित असते.

ग्रॅच्युइटीचे कॅल्क्युलेशन कसे होते

ग्रॅच्युइटी कॅल्क्युलेटर म्हणजे काय?

पाच वर्षांच्या सतत सेवेनंतर कंपनी सोडल्यावर तुम्हाला किती रक्कम मिळेल याचा अंदाज ग्रॅच्युइटी कॅल्क्युलेटरमध्ये येतो. ग्रॅच्युइटीचा आकडा त्वरित मिळविण्यासाठी तुमचा शेवटचा पगार आणि एकूण सेवेचा कार्यकाळ प्रविष्ट करा.

ग्रॅच्युइटी मोजण्याचे सूत्र

ग्रॅच्युइटी कायद्यांतर्गत येणाऱ्या कर्मचाऱ्यांसाठी ग्रॅच्युइटीची गणना एका सूत्राद्वारे केली जाते. यासाठी तुम्हाला एकाच कंपनीत कमीत कमी पाच वर्षे काम करावे लागेल. जर तुम्ही त्यापेक्षा जास्त काळ काम केले तर तुम्हाला ग्रॅच्युइटी दिली जाईल. कामाच्या प्रत्येक वर्षासाठी तुम्हाला 15 दिवसांच्या पगाराएवढी रक्कम दिली जाईल. जरी तुम्ही एका वर्षात 6 महिन्यांपेक्षा जास्त काळ काम केले तरी ते एक वर्ष म्हणून गणले जाईल. म्हणजेच, तुम्ही पाच वर्षे 6 महिने काम केले तरी ते सहा वर्षे मानले जाईल. ग्रॅच्युइटीचे सूत्र (मासिक पगार x 15 x सेवा कालावधी) / 26 (कामाचे दिवस) आहे. येथे, 15 दिवस म्हणजे 15 दिवसांचा पगार आणि 26 म्हणजे महिन्यातील 26 कामकाजाचे दिवस. मूळ वेतनाच्या वर मासिक पगार लावला जातो.

आता 30000 रुपयांच्या मूळ वेतनावर 5 वर्षे, 10 वर्षे आणि 7 वर्षे काम केल्यानंतर किती ग्रॅच्युइटी मिळेल याचे सूत्र जाणून घेऊया.

5 वर्षांच्या सेवेचे कॅल्क्युलेशन

5 वर्षांच्या सेवेसाठी मूळ वेतन 30 हजार रुपये ग्रॅच्युइटी = (30000x15x5)/26 = 86538.46. या गणनेनुसार 7 वर्षांच्या सेवेसाठी, ग्रॅच्युइटी 121153.84 रुपये आहे. तर 10 वर्षांच्या सेवेसाठी, ग्रॅच्युइटी 173076.92 रुपये आहे. त्याचप्रमाणे, तुम्ही तुमच्या सेवा कालावधीनुसार तुमचा पगार मोजू शकता.

जर तुम्ही 15 वर्षे 30000 रुपये शेवटच्या पगारावर काम केले असेल, तर ग्रॅच्युइटी खालीलप्रमाणे असेल: ग्रॅच्युइटी = (15 x 30000 x 15) / 26 = 2,59,615 रुपये.

कमाल ग्रॅच्युइटी रक्कम 20लाख रुपये आहे. कोणतीही जास्तीची रक्कम एक्स-ग्रेशिया म्हणून गणली जाईल.