EPFO: विशेष प्रकरणात पीएफ पू्र्णपणे काढता येतो, कसं काय ते समजून घ्या
ईपीएफओने आपल्या नियमात बदल केला आहे. त्यामुळे काही प्रकरणात पीएफची रक्कम पूर्णपणे काढता येते. या प्रकरणात क्लेम रिजेक्ट होत नाही आणि गरजेवेळी हातात रक्कम पडण्याची आशा असते.
नोकरी करणाऱ्या व्यक्तींचे पैसे पीएफ खात्यात जमा होतात. कंपनी आणि नोकरी करणाऱ्या व्यक्तीची ठरावीक रक्कम दर महिन्याला खात्यात जमा होते. त्यामुळे गरजेवेळी ही रक्कम नोकरदार व्यक्तींसाठी फायदेशीर ठरते. असं असताना ईपीएफओ अर्थात कर्मचारी भविष्य निर्वाह निधी संघटनेने आपल्या लाखो सदस्यांना दिलासा दिला आहे. पीएफ खात्यातील रक्कम पूर्णपणे काढण्याची प्रक्रिया आणखी सुलभ केली आहे. नव्या नियमानुसार, पात्र सदस्य आता विशिष्ट प्रकरणात कारण न देता संपूर्ण रक्कम काढू शकतील. ईपीएफओच्या मते, या नव्या बदलामुळे क्लेम नाकारण्याचं प्रमाण कमी होणार आहे. तसेच कर्मचाऱ्यांना गरजेवेळी आर्थिक मदत होणार आहे. मिंटच्या रिपोर्टनुसार, ईपीएफओने सदस्य-स्नेही सुधारणांचा भाग म्हणून पीएफ काढण्याच्या नियमात बदल केला आहे.
पीएफधारकांना पूर्वी पीएफची रक्कम काढण्यासाठी कारण द्यावं लागत होते. तसेच यासाठी आवश्यक आणि संबंधित कागदपत्र, पुरावे जोडावे लागत होते. अशा स्थितीत क्लेम योग्य श्रेणीत नसल्यास दावे फेटाळले जायचे. त्यामुळे आपल्याच पैशांसाठी हेलपाटे मारण्याची वेळ येत होती. आता नव्या नियमानुसार, पात्र सदस्य कोणतेही कारण न देता विशेष प्रकरण श्रेणीअंतर्गत अर्ज करू शकतात. यामुळे प्रक्रिया आणखी सोपी होईल आणि कर्मचाऱ्यांना सहज निधी मिळेल.
कोणत्या प्रकरणात पीएफ पूर्ण काढू शकता?
ईपीएफओच्या मते, काही विशेष स्थितीत 100 टक्के पीएफ रक्कम काढण्याची परवानगी आहे. कंपनी 15 दिवस किंवा त्यापेक्षा अधिक काळ बंद असेल आणि कर्मचाऱ्यांना कोणताही मोबादला न देता बेरोजगार व्हावं लागलं असेल. कंपनीकडून दोन महिन्यांहून अधिक काळ पगार झाला नसेल आणि त्याचं कारण हे संप नसेल, तर ती व्यक्तीही पीएफ काढू शकते. नोकरीवरून काढलं असेल किंवा कॉस्ट कटिंगमध्ये कर्मचाऱ्याचं प्रकरण कोर्टात प्रलंबित असेल तर पूर्ण पीएफ काढू शकता. दीर्घ काळ कंपनी बंद असेल आणि बेरोजगारीची स्थितीही या श्रेणीत येते. गंभीर आजार आणि कौटुंबिक उपचारासाठीही हा नियम लागू आहे.
असेच पैसे काढण्यासंदर्भात काय आहे नियम?
ईपीएफओने स्पष्ट केलं की, ही सुविधा फक्त विशेष स्थितीत वापरता येईल. सामन्य स्थितीत पैसे काढायचे झाले तर जास्तीत जास्त 75 टक्के रक्कम काढता येईल. तसेच विशेष प्रकरणात पात्रतेचे निकष पूर्ण केल्यास संपूर्ण रक्कम काढण्याची परवानगी दिली जाऊ शकते.
