Federal Reserve: 11,645 किमी अंतर, एक निर्णय, अनेक परिणाम..शेअर बाजारात ट्रेलर, भारतीय बाजारपेठेत दिसरणार पिक्चर..

नवी दिल्ली : भारतासह जगभरातील अर्थव्यवस्था (World Economy) महागाई आटोक्यात आणण्यासाठी जोरदार प्रयत्न करत आहेत. विकसनशील तर सोडाच पण विकसीत राष्ट्रेही महागाईने (Inflation) हैराण झाली आहेत. त्यातच अमेरिकेत महागाई आटोक्यात आणण्यासाठी करण्यात येत असलेले प्रयत्न भारतातील ग्राहकांसाठी (Indian Consumer) तापदायक ठरण्याची शक्यता आहे, कसे? ते पाहुयात..

अमेरिकन मध्यवर्ती बँक फेडरल रिझर्व्हच्या प्रयत्नांना काही केल्या यश मिळत नसल्याचे चित्र आहे. गेल्या अनेक तिमाहीपासून बँक महागाई आटोक्यात आणण्यासाठी व्याजदर वाढीचे आक्रमक धोरण राबवित आहे.

अमेरिकन फेडरल रिझर्व्हच्य या धोरणामुळे व्याजदर 2008 सालापेक्षाही जास्त गेला आहे. पण महागाई आटोक्यात येण्याचे काही नाही. बुधवारी फेडरल रिझर्व्हने व्याजदरात पुन्हा 0.75 टक्क्यांची वाढ केली.

व्याजदरात चौथ्यांदा ही वाढ करण्यात आली. त्यामुळे व्याजदर वाढून आता 4 टक्क्यांवर पोहचला आहे. फेडचे अध्यक्ष जेरोम पॉवेल यांनी इशारा दिल्याप्रमाणे, ही शेवटची वृद्धी असू शकते.

अर्थात या निर्णयाचा जोरदार फटका जगभरातील शेअर बाजारावर पडला. अमेरिकन शेअर बाजारात धमाका झाल्यानंतर त्याचा परिणाम भारतीय शेअर बाजारावरही दिसून आला. बाजार धडाधड कोसळले.

सुरुवातीच्या सत्रात सेन्सेक्स (Sensex) 250 अंकांनी घसरला. तर निफ्टी (Nifty) मध्येही मोठी घसरण दिसून आली. त्यानंतर बाजारात काही बदल दिसून आला. बाजारात सुधारणा झाली.

अमेरिकेचा ग्राहक महागाई निर्देशांक 8.2 टक्के आहे. सप्टेंबर महिन्यातील हा आकडा आहे. त्यात मामूली घसरण झाली आहे. यापूर्वी ऑगस्ट महिन्यात हा निर्देशांक 8.3 टक्के होता. महागाईने गेल्या चार दशकातील रेकॉर्ड तोडले आहेत.

अमेरिकेच्या या उपाय योजनेतनंतर भारतीय रिझर्व्ह बँकेवरही महागाई नियंत्रणात आणण्यासाठी मोठा दबाव वाढला आहे. त्यामुळे दूर 11,645 किमी अंतरावर घडलेल्या घडामोडीचा थेट परिणाम भारतीय बाजारावर प्रत्यक्ष, अप्रत्यक्षरित्या होणार आहे.

भारताच्या आयातीवर त्याचा थेट परिणाम दिसून येईल. पूर्वीपेक्षा जास्त भावाने वस्तूंची खरेदी करावी लागणार आहे. अमेरिकन निर्यातीवर त्याचा परिणाम दिसून येईल. आरबीआयने पुन्हा रेपो दर वाढवला तर त्याचा थेट परिणाम ग्राहकांवर दिसून येईल.