गुन्हे शाखेकडून केलेल्या कारवाईच्या निरीक्षणातून समोर आली धक्कादायक बाब, अल्पवयीन मुलांसह तरुणाईमध्ये कसली ‘पॅशन’ ?

नाशिक : गेल्या काही महिन्यांपासून नाशिक शहर पोलीसांच्या गुन्हे शाखेकडून करण्यात आलेल्या कारवाईमधून एक धक्कादायक निरीक्षण समोर आले आहे. संशयित आरोपीमध्ये अल्पवयीन मुलांचा सहभाग आणि धारधार शस्र बाळगण्याची पॅशनच एकप्रकारे तरुणाईमध्ये दिसून येत आहे. त्यामुळे शस्र बाळगणे असा ट्रेंडच गुंडांमध्ये सुरू असल्याचे समोर आल्यानं पोलिसांसमोरील आव्हान वाढत चाललं आहे. त्यातच शहरात देखील यानिमित्ताने भितीचे वातावरणं निर्माण होत असून पालकांची चिंता वाढवणारी बाब आहे. नाशिक शहराचे पोलीस आयुक्त अंकुश शिंदे यांच्या आदेशानंतर दरोडा आणि शस्त्रे विरोधी पथकाला सूचना देण्यात आल्या होत्या. त्यामध्ये दोन ठिकाणी मोठी कारवाई करण्यात आली आहे.

नाशिकरोड पोलीस ठाण्याच्या हद्दीत वीस वर्षीय तरुणाला ताब्यात घेत त्याच्याकडून पिस्तूल हस्तगत करण्यात आले आहे.

नुकतीच झालेली दुसरी कारवाई बघता 21 वर्षीय तरुणाकडे कारसह चॉपर जप्त करण्यात आला आहे. या दोन्ही कारवाई बघता त्यांनी पॅशन म्हणून ही हत्यारे बाळगल्याचे समोर आले आहे.

नाशिक शहरातील गुन्हेगारी मोडीत काढण्यासाठी काही खास पथके तयार करण्यात आली आहे. यामध्ये गुन्हे शाखेच्या अंतर्गत काही पथकांनी शहरातील संशयीत तरुणांची तपासणी सुरू केली आहे.

यामध्ये नाशिक शहर पोलिसांना तरुणाईमध्ये शस्र बाळगत असल्याचा शोध घेण्यात यश येत असले तरी शहरात अवैधरित्या शस्र कसे पोहचतात याचा छडा लावणे महत्वाचे ठरणार आहे.

नाशिक शहरातील तरुणाईकडे घातक शस्रे आढळून येत आहे. गावठी कट्टेही आढळून येत असल्याने शहरात छुप्या पद्धतीने शस्र विक्री केली जात असल्याची चर्चा यानिमित्ताने होऊ लागली आहे.

पोलीसांनी सुरू केलेली ही धरपकड मोहीम बघता शस्र बाळगणाऱ्या तरुणाईचे धाबे चांगलेच दणाणले आहे.

पिस्तूल घेऊन कॉलनी दहशत निर्माण करणाऱ्या गुड्या उर्फ आतिष शांताराम चौधरी आणि क्रिकेट खेळणारा तरुण जयेश जिभाऊ अहिरे यांच्याकडे चॉपर आढळून आल्याने त्यांना अटक करण्यात आली आहे.