बुडत असल्याचं पाहून वाचवायला गेले आणि सगळेच बुडाले! चौघा अल्पवयीनांसह 7 जणांचा मृत्यू, नेमकी कुठं घडली घटना?

मुंबई : रविवारी मावळमध्ये (Pune News) इंद्रायणी नदीत गोधडी धुवायला गेलेल्या मायलेकाचा बुडून मृत्यू झाल्याची घटना ताजी असतानाचा आता आणखी एक दुर्दैवी घटना समोर आली आहे. एकूण सात जणांचा बुडून मृत्यू (Drowned) झाला आहे. सात मृतांपैकी चौघेजण हे अल्पवयीनं होते. ही घटनाही रविवारीच घडली. तामिळनाडूच्या (Tamil Nadu News) गेडीलाम नदीत सात जण बुडाले होते. सुरुवातीला काही जण बुडत होते. त्यांना वाचवण्यासाठी गेलेल्यांचाही बुडून दुर्दैवी अंत झाला. याबाबतची माहिती मिळाल्यानंतर तामिळनाडूच्या मुख्यमंत्र्यांनीही दुःख व्यक्त केलं आहे. तसंच मृतांच्या कुटुंबीयांना पाच लाख रुपयांची मदत घोषित केलीय. सात जणांचा बुडून मृत्यू झाल्यानं कुटुंबीयांवर दुःखाचा डोंगर कोसळलाय.

कुठे घडली घटना?

तामिळनाडूच्या कुड्डालोर जिल्ह्यातील पनरुट्टीजवळ असलेल्या किलारुंगुनाम या गावात ही दुर्दैवी घटना घडली. सात जणाांचा बुडून मृत्यू झाल्यानं संपूर्ण जिल्ह्यात हळहळ व्यक्त केली जातेय. या भागात असलेल्या गेडीलाम नदीत ही दुर्दैवी घटना घडली.

पाच लाखांची मदत

दरम्यान, या घटनेनं राज्यपाल आरएन रवी यांनीही खेद व्यक्त केलाय. मृतांच्या नातेवाईकांना ईश्वर या कठीण प्रसंगातून लढण्याचं बळ देवो, अशी प्रार्थनना त्यांनी केली आहे. तर दुसरीकडे मुख्यमंत्री एमके स्टॅलिन यांनीही या घटनेची गंभीर दखल घेतली आहे. त्यांनी तातडीनं पाच लाख रुपयांची मदत मृतांच्या नातेवाईकांना जाहीर केली आहे. मुख्यमंत्री पब्लिक रिलिफ फंडातून ही मदत देण्यात येणार आहेत.

पाहा महाराष्ट्रातील पावसाची बातमी :

काळजी घ्या! प्रशासनाला निर्देश

या घटनेनंतर आता प्रशासनाला उपाययोजना करण्याचेही निर्देश जारी करण्यात आले आहेत. अशा घटना टाळण्यासाठी धोकादायक ठिकाणी सूचना फलक आणि सतर्कता बाळगण्याच्या दृष्टीने खबरदारी घेण्यासाठी प्रशासनानं पावलं उचलावीत, असे निर्देश देण्यात आले आहेत.