Gondia Illegal Abortion : गोंदियात अल्पवयीन मुलीवर अत्याचार, मग बेकायदेशीर गर्भपात; मुलीची प्रकृती गंभीर
आरोपी तरुण आणि पीडित अल्पवयीन मुलगी हे दोघे शेजारी शेजारीच राहतात. दोघांमध्ये काही दिवसांपूर्वी प्रेमसंबंध जुळले. याच प्रेमसंबंधातून मुलगी गरोदर राहिली.
गोंदिया : गोंदिया-भंडारा अत्याचाराची शाई वाळत नाही तोच गोंदिया जिल्ह्यात पुन्हा एका अल्पवयीन मुलीवर अत्याचार केल्याची धक्कादायक घटना दवनीवाडा पोलिस स्टेशन अंतर्गत उघडकीस आली आहे. या घटनेने जिल्ह्यात एकच खळबळ उडाली आहे. अल्पवयीन मुलीवर 26 वर्षाच्या तरूणाने भूलथापा देत सतत लैंगिक अत्याचार (Sexual Abused) केला. यात ती अल्पवयीन मुलगी चार महिन्याची गर्भवती (Pregnant) झाली. यानंतर तरुणाने गर्भपाताच्या गोळ्या देत तिचा गर्भपात (Abortion) केला. मात्र यामुळे मुलीची प्रकृती गंभीर आहे. याप्रकरणी दवनीवाडा पोलीस ठाण्यात नोंद करण्यात आली असून, पोलिसांनी एका आरोपीला अटक केले आहे.
गर्भपाताच्या गोळ्या खाल्ल्यानंतर मुलीची प्रकृती बिघडली
आरोपी तरुण आणि पीडित अल्पवयीन मुलगी हे दोघे शेजारी शेजारीच राहतात. दोघांमध्ये काही दिवसांपूर्वी प्रेमसंबंध जुळले. याच प्रेमसंबंधातून मुलगी गरोदर राहिली. मुलगी गरोदर राहिल्याचे कळताच आरोपी तरुणाने तिला मेडिकलमधून डॉक्टरच्या प्रिस्क्रिप्शनशिवाय गर्भपाताच्या गोळ्या खरेदी करुन दिल्या. या गोळ्या खाल्ल्यानंतर अर्धवट गर्भपात झाल्याने मुलीची प्रकृती गंभीर झाली. यानंतर तिला उपचारासाठी गोंदियातील बाई गंगाबाई रुग्णालयात दाखल करण्यात आले. यावेळी डॉक्टरांनी तिची वैद्यकीय तपासणी केली असता सर्व प्रकार उघडकीस आला. यानंतर पोलिसांना याबाबत माहिती देण्यात आली. पोलिसांनी याप्रकरणी आरोपी तरुणाला अटक केले आहे. मुलीची प्रकृती गंभीर असून, उपचार सुरु आहेत. दरम्यान याप्रकरणी शिवसेना आक्रमक झाली असून, शिवसेनेच्या आमदार मनिषा कायंदे यांनी बाई गंगाबाई रूग्णालयाला भेट देत पिडीतेची विचारपूस करीत शिंदे सरकारवर हल्लाबोल केला. (A minor girl was abused and illegally aborted, the girls condition is critical in Gondia)
