Thane Accident : रस्ता ओलांडण्यासाठी उभ्या असलेल्या महिलेला ठामपाच्या बसने चिरडले, महिला गंभीर जखमी

ठाणे : ठाणे शहरात अनेक ठिकाणी विविध रस्त्यांचे काम सुरू आहेत. त्यामुळे वाहतुकीत देखील बदल करण्यात आलेला आहे. या बदलण्यात आलेल्या प्रस्थानामुळे परिवहन सेवेची मार्गिका देखील बदलण्यात आली आहे. यामुळे रस्ते अपघात घडत आहेत. असाच एक भयंकर अपघात ठाण्यातील सावरकर नगर येथे उघडकीस आला आहे. एका मार्गिकेवरुन दुसऱ्या मार्गिकेवर वळण घेत असलेल्या बसच्या मागच्या चाकाखाली येऊन एक महिला गंभीर जखमी झाल्याची खळबळजनक घटना घडली आहे. आशा मोरे असे जखमी महिलेचे नाव आहे.

ठाणे रेल्वे स्थानकाकडे जात होती बस

लोकमान्य नगर बस डेपोतून सुटलेली ठाणे परिवहन मंडळाची ही बस ठाणे रेल्वे स्थानकाकडे चालली होती. यादरम्यान लोकमान्य ते नितिन कंपनी दरम्यान सावरकरनगर येथे येताच बस मार्गिका बदलत होती. यावेळी अपघाताची धक्कादायक घटना घडली.

बसने वळण घेत असतानाच महिला चाकाखाली आली

याचवेळी जखमी आशा मोरे या रस्ता ओलांडण्यासाठी दुभाजकाजवळ उभ्या होत्या. दुसऱ्या मार्गिकेवर जाण्यासाठी बसने वळण घेताच दुभाजकाजवळ उभी असलेली महिला बसच्या मागच्या चाकाखाली आली. ही संपूर्ण थरारक घटना सीसीटीव्ही कॅमेऱ्यात कैद झाली आहे.

अपघातात महिला गंभीर जखमी

या अपघातात महिलेच्या उजव्या पायाला गंभीर दुखापत झाली आहे. महिलेला उपचारासाठी मुंबईतील जे जे रुग्णालयात दाखल करण्यात आले आहे. याप्रकरणी पोलीस अधिक तपास करत आहेत.

हिंगोलीत सलग दुसऱ्या दिवशी बसचा अपघात

हिंगोलीतील सलग दुसऱ्या दिवशी बसला अपघात झाल्याची घटना उघडकीस आली आहे. नांदेड-हिंगोली मार्गावर कळमनुरी तालुक्यातील मसोड शिवरात बसचा पाटा तुटल्याने बस पलटी झाली. सालवाडीवरून कळमनुरीकडे बस चालली होती. बसमध्ये शालेय विद्यार्थ्यांसह 17 ते 18 प्रवासी होते. अपघातात विद्यार्थ्यांसह 8 प्रवासी जखमी झाले आहेत.