अर्जुन खोतकरांच्या अडचणीत वाढ! रामनगर साखर कारखान्यावर निर्बंध लावण्याचे आदेश
अर्जुन खोतकर यांनी 100 कोटीचा घोटाळा केला आहे, असा आरोप भाजप नेते किरीट सोमय्या यांनी केला होता. त्याची तक्रार सक्तवसुली संचलनालय अर्थात ईडी आणि आयकर विभागाकडे करण्यात आली होती.
औरंगाबाद : शिवसेना नेते अर्जुन खोतकर (Arjun Khotkar) यांच्या अडचणीत वाढ होण्याची शक्यता आहे. रामनगर साखर कारखान्यावर निर्बंध लावण्याचे आदेश आता ईडीनं दिले आहेत. जालना जिल्हाधिकाऱ्यांना पत्र लिहून निर्बंध लावण्याचे आदेश ईडीनं दिले असल्यानं खोतकरांच्या अडचणी वाढण्याची शक्यता आहे. कारखान्याचा वापर विक्री आणि व्यवहार करण्यावर निर्बंधही घालण्यात आलेत. या संपूर्ण प्रकरणी ईडी चौकशी सुरू असल्यामुळे निर्बंध लावण्याचे आदेश जारी करण्यात आले आहेत. गेल्या 2 महिन्यांपासून अर्जुन खोतकर यांची ईडी चौकशी सुरु आहेत. रामनगर साखर कारखाना गैरव्याहर प्रकरणी अर्जुन खोतकर यांची ईडी चौकशी (ED Inquiry) केली जाते आहेत. ही चौकशी सुरु असतानाच आता साखर कारखान्यावर (Suger Factory) निर्बंध लावण्याचे आदेश देण्यात आल्यानं अर्जुन खोतकर यांच्या अडचणी आणखी वाढल्यात.
100 कोटींच्या घोटाळ्याचा आरोप
अर्जुन खोतकर यांनी 100 कोटीचा घोटाळा केला आहे, असा आरोप भाजप नेते किरीट सोमय्या यांनी केला होता. त्याची तक्रार सक्तवसुली संचलनालय अर्थात ईडी आणि आयकर विभागाकडे केल्याची माहिती सोमय्या यांनी दिली असल्याचं नोव्हेंबर 2021मध्ये म्हटलं होतं. मुळे, तापडिया आणि खोतकरांनी मिलिभगत करुन कारखान्याचा घोटाळा केल्याचा आरोप सोमय्या यांनी केला होता. कारखान्याची 100 एकर जमीन हडप करण्याचा प्रयत्न सुरु असल्याचं सोमय्या म्हणाले होते. त्या जमिनीवर कॉम्प्लेक्स बांधण्याचा प्रयत्न सुरु आहे. अर्जुन खोतकर यांची 100 कोटीचा कारखाना आणि 1 हजार कोटींच्या शेतकऱ्यांच्या जमिनीच्या घोटाळ्याची चौकशी सुरु झाली होती.
अर्जून खोतकर हे सध्या जालन्यातील कृषी उत्पन्न बाजार समितीचे सभापती आहेत. त्यामुळे जालन्यातील कृषी उत्पन्न बाजार समितीचीही ईडीकडून तपासणी करण्यात आली होती. जालन्यात दोन ठिकाणी सक्तवसुली संचलनालयातर्फे धाडी टाकण्यात आल्या होत्या.
सोमय्यांच्या आरोपांनंतर EDची तत्काळ कारवाई
शिवसेनेचे नेते अर्जून खोतकर यांच्या निवासस्थानी 26 नोव्हेंबर, 2021 रोजी सकाळीच साडे आठ वाजल्यापासून ईडीचं पथक खोतकरांच्या भाग्यनगर येथील बंगल्यात दाखल झाले होते. 12 जणांच्या या पथकाने घराचे दरवाजे आतून लावून घेत तपासणी सुरु केली होती. यावेळी अर्जुन खोतकर घरीच होते.
औरंगाबादमधील उद्योजकांच्या माध्यमातून रामनगर सहकारी साखर कारखान्यात आर्थिक संबंध असल्याची तक्रार सोमय्यांनी केली होती. यापूर्वी खोतकरांनी हे सर्व आरोप फेटाळून लावले होते. आपले काही लाखांचे शेअर्स कारखान्यात असल्याचंही खोतकरांनी म्हटलं होतं. आपण भागीदार आहोत, मालक नाही, असं स्पष्टीकरण खोतकरांनी त्यावेळी दिलं होतं.
संबंधित बातम्या :
ब्लॅकमेलिंग, तपास यंत्रणेचा दुरुपयोग हा भाजपचा धंदा, नाना पटोलेंची टीका
