फुटबॉल सामन्यादरम्यान दोन टीममध्ये फ्री स्टाईल, सतेज चषक स्पर्धेदरम्यान घडला प्रकार
कोल्हापुरातील शाहू स्टेडिअमवर बुधवारी दुपारी सतेज फुटबॉल सामना सुरु होता. यावेळी बीजीएम स्पोर्टसने 2-1 अशी आघाडी मिळवली होती. मात्र सामना संपण्यास काही वेळ शिल्लक असतानाच दोन्ही संघातील खेळाडू एकमेकांच्या अंगावर धावून गेले.
कोल्हापूर / भूषण पाटील : फुटबॉल सामन्यादरम्यानच खेळाडूंच्या दोन संघात मैदानातच फ्री स्टाईल हाणामारी झाल्याची घटना कोल्हापुरात बुधवारी घडली. बिजिएम स्पोर्ट्स आणि झुंजार क्लबच्या सामन्यात खेळाडू एकमेकांच्या अंगावर धावले. छत्रपती राजश्री शाहू स्टेडियमवर सतेज चषक स्पर्धा सुरू असताना हा प्रकार घडला. यामुळे कोल्हापूरच्या फुटबॉलला पुन्हा एकदा गालबोट लागले आहे. या घटनेमुळे मैदानावर काही वेळ तणावाचे वातावरण निर्माण झाले होते. याप्रकरणी दोन्ही संघातील चार खेळाडूंवर रेड कार्ड दाखवून बाहेर काढण्यात आले. तर खेळाडू आणि समर्थकांसह एकूण 50 जणांवर गुन्हे दाखल करण्यात आले.
शाहू स्टेडिअमवर सामना सुरु असताना घडला प्रकार
कोल्हापुरातील शाहू स्टेडिअमवर बुधवारी दुपारी सतेज फुटबॉल सामना सुरु होता. यावेळी बीजीएम स्पोर्टसने 2-1 अशी आघाडी मिळवली होती. मात्र सामना संपण्यास काही वेळ शिल्लक असतानाच दोन्ही संघातील खेळाडू एकमेकांच्या अंगावर धावून गेले. काही क्षणात मैदानाला आखाड्याचे स्वरुप प्राप्त झाले. वाद मिटवण्याचा प्रयत्न सुरु असतानाच दोन्ही संघातील राखीव खेळाडू एकमेकांच्या अंगावर धावून आल्याने वाद आणखी वाढला.
दोन्ही संघातील चार खेळाडूंना रेड कार्ड दाखवून बाहेर काढले
अखेर संयोजकांनी मैदानावर दाखल होत वाद मिटवला. यानंतर दोन्ही संघातील चार खेळाडूंना रेड कार्ड दाखवत मैदानाबाहेर काढले. झुंजार क्लबमधील सूर्यप्रकाश सासने, अवधूत पाटोळे आणि बीजीएम स्पोर्ट्समधील अभिजीत साळोखे, महेश जामदार यांना रेड कार्ड दाखवून बाहेर काढण्यात आले.
