फटाके फोडण्यावरुन राडा! धक्काबुक्की, दगडफेक आणि बरंच काही, नेमकी कुठं घडली घटना?

गुजरात : दिवाळी साजरी करताना (Diwali Celebration) फटक्यांच्या आतषबाजीदरम्यान वडोदरामध्ये (Vadodara) तुफान राडा झाला. फटाके फोडण्यावरुन झालेल्या वादाचं रुपांतर आधी बाचाबाचीत झालं. त्यानंतर एकमेकांना धक्काबुक्की करणं, मग मारहाण, त्यानंतर दगडफेक करण्यापर्यंत हा वाद पोहोचला होता. अखेर पोलिसांना लाठीचार्ज करुन धुडगूस घालणाऱ्यांना आवर घालावा लागला होता. या राड्यामुळे एकच तणाव निर्माण झाला होता. अखेर पोलिसांनी परिस्थिती नियंत्रणात आणली असून चोख बंदोबस्तही आता तैनात करण्यात आला आहे. ही संपूर्ण घटना वडोदरा येथील पानीघाट परिसरात (Gujrat News) असलेल्या मुस्लिम रुग्णालयाच्या जवळ घडली.

पानीघाट परिसरात दोन गट भिडले असल्याची माहिती वडोदरा पोलिसांना मिळाली. त्यानंतर पोलिसांनी लगेचच घटनास्थळी धाव घेतली. पोलिसांच्या पथकाने परिस्थिती नियंत्रणात आणण्यासाठी सौम्य लाठीचार्ज केलं आणि धुडगूस घालणाऱ्यांना आवर घातला.

आता याप्रकरणाच्या सीसीटीव्ही फुटेजचा पोलीस शोध घेत आहेत. त्यानंतर तपासाअंती दोषींवर कारवाई केली जाईल, असं पोलिसांनी म्हटलंय.

पाहा लाईव्ह घडामोडी :

मुस्लिम रुग्णालयाजवळ तरुणांचा एक गट फटाके फोडत होते. त्यावेळी दुसरा एक गट आणि त्यांनी तरुणांच्या पहिल्या गटावर आक्षेप घेतला. यावरुन वाद सुरु झाला. दरम्यान, वाद वाढत असल्याचं पाहून दुसऱ्या गटातून लोकांनी आणखी काहींना बोलावलं आणि मारमारी सुरु केली. यावेळी दगडफेकही करण्यात आल्याचं समोर आलंय.

10 पेक्षा जास्त लोक या राड्यात जखमी झालेत. मात्र याबाबतचा अधिकृत आकडा अद्याप स्पष्ट करण्यात आलेला नाही. पेट्रोल बॉम्बही यावेळी एकमेकांवर फेकण्यात आल्याचं पोलिसांनी म्हटलंय. तर काही दुकानांची आणि गाड्यांचीही तोडफोड करण्यात आली.

अग्निशमन दलाच्या जवानांच्या मदतीने पोलिसांनी अखेर सगळी परिस्थिती नियंत्रणात आणली. आतापर्यंत या राड्याप्रकरणी दोघा संशयितांना पोलिसांनी ताब्यात घेतलंय. त्यांची कसून चौकशी केली जातेय.

एकीकडे गुजरातच्या वडोदरामध्ये राडा झाला. तर दुसरीकडे राजकोटमध्येही अशाच प्रकारी घटना झाल्याचीही माहिती समोर आली आहे. आता या दोन्ही घटनांप्रकरणी गुजरात पोलिसांकडून पुढील तपास केला जातो आहे.