असं काय घडलं की युवक आई-वडील आणि आजीच्या जीवावर उठला?, लहान मुलगा आला नि खुलासा झाला

रायपूर : सरायपायली ब्लॉकच्या पुटका येथील रहिवासी प्रभात भोई (वय ५२) हे उच्च माध्यमिक शाळेत मुख्याध्यापक होते. प्रभात यांना दोन मुलं आहेत. मोठा उदीत (वय २४) आणि लहान अमित. अमित रायपूरच्या पंडित जवाहरलाल नेहरू मेडिकल कॉलेजमध्ये एमबीबीएस करत होता. उदीत हा बेरोजगार होता. आपल्या आईवडिलांना नेहमी पैसे मागत होता. पैसे न मिळाल्यास वाद घालत होता. पैसे मिळाले नाही म्हणून उदीतने आधी आपल्या वडिलांचा खून करून त्याजागी अनुकंपा नोकरी मिळवण्यासाठी प्लान केला. घरी आई झरना भोई (वय ४७) आणि आजी सुलोचना (वय ७५) होती. या दोघे त्याच्या प्लानमध्ये अडचण ठरत होत्या.

छत्तीसगड पोलिसांनी एका युवकाला त्याची आई, वडील आणि आजीच्या हत्येप्रकरणी अटक केली. आरोपी युवकाने तिघांनाही हॉकी स्टीकने मारले आणि सॅनीटायझरने मृतदेह जाळून घरातील वाड्यात पुरला. आरोपीचे वडील उच्च माध्यमिक शाळेत मुख्याध्यापक होते. त्यांना मारून त्यांच्या अनुकंपा जागेवर त्याला नियुक्ती हवी होती. यासाठी त्याने तिघांना मारण्याचा प्लान केला.

रात्री तिघेही झोपले होते. उदीतने हॉकी स्टीकने तिघांवर वार केला. खून केल्यानंतर तिघांचे मृतदेह घरी लपवून ठेवले. फिनाईलने संपूर्ण घर स्वच्छ केले. तिन्ही मृतदेहांना सॅनेटाईझर टाकून जाळले.

तिघांना मारून बेपत्ता असल्याची तक्रार

१२ मे रोजी आई-वडील आणि आजी बेपत्ता असल्याची तक्रार केली. ८ मे रोजी तिघेही उपचारासाठी रायपूरला गेले होते. तेथून अद्याप आले नाही, अशी तक्रार केली.

शेजाऱ्यांना संशय

तिघांच्या हत्यानंतर उदीत बेहिशोबी खर्च करू लागला. चार दिवसांत पलंग, आलमारी, एसी, मोबाईल अशा वस्तू खरेदी केल्या. यामुळे शेजाऱ्यांना संशय आला. याची माहिती शेजाऱ्यांनी लहान मुलाला दिली.

लहान मुलगा अमित पुटका येथे आला. घराच्या मागच्या भागात जळल्याचे निशाण सापडले. राख हटवल्यानंतर त्याला हाडं दिसली. घराची तपासणी केली असता रक्ताचे डाग दिसले. खड्ड्यातून राखही सापडली. त्याने पोलिसांना बोलावले. पोलिसांना मोठ्या मुलावर संशय आला. विचारपूस केल्यानंतर त्याच्याकडून हॉकी स्टीक, सॅनिटायझर लायटर जप्त करण्यात आले.