Thane Crime : उल्हासनगरात तरुणाची दादागिरी, फुकट चहा दिला नाही म्हणून हॉटेल मालकालाच…
हल्ली कोण कुणाला कोणत्या कारणातून मारहाण करेल सांगू शकत नाही. दुकानदार, हॉटेल मालकांना मारहाणीच्या घटनाही वाढल्या आहेत. यामुळे व्यापारी वर्गात भीतीचे वातावरण आहे.
उल्हासनगर / 31 ऑगस्ट 2023 : ठाणे जिल्ह्यात गुन्हेगारी मोठ्या प्रमाणात वाढली आहे. क्षुल्लक कारणातून मारहाणीच्या घटना तर सतत घडत आहेत. अशीच एक घटना उल्हासनगरात उघडकीस आली आहे. फुकट चहा दिला नाही म्हणून एका तरुणाने हॉटेल मालकाला बेदम मारहाण केल्याची घटना उल्हासनगर कॅम्प 3 मध्ये घडली आहे. मारहाणीची घटना हॉटेलमधील सीसीटीव्ही कॅमेऱ्यात कैद झाली आहे. याप्रकरणी उल्हासनगर पोलीस ठाण्यात तिघांविरोधात गुन्हा दाखल करण्यात आला आहे. बिट्टू असे मुख्य आरोपीचे नाव आहे, तर अज्जू सचदेव असे मारहाण झालेल्या हॉटेल मालकाचे नाव आहे. या घटनेमुळे परिसरात एकच खळबळ उडाली आहे. व्यापारी वर्गात भीतीचे आणि संतापाचे वातावरण पसरले आहे.
काय घडलं नेमकं?
उल्हासनगर कॅम्प नंबर 3 मध्ये खट्टनमल चौकात कन्हैया चहा नावाचं हॉटेल आहे. या हॉटेलमध्ये आरोपी बिट्टू हा चहा पिण्यासाठी आला. त्याने हॉटेल मालक करण सचदेव यांना मला फुकट चहा पाहिजे असे सांगितले. मालक करण सचदेव याने फुकट चहा देण्यास नकार दिला. यानंतर बिट्टू निघून गेला. मात्र काही पुन्हा दोन साथीदारांना घेऊन हॉटेलमध्ये आला. यावेळी करण यांचा भाऊ अज्जू सचदेव हा काऊंटरवर बसला होता.
आरोपीने अज्जूला घडलेली घटना सांगितली, मात्र अज्जूनेही फुकट चहा देण्यास नकार दिला. यामुळे संतापलेल्या बिट्टूने दोन साथीदारांसह अज्जूला बेदम मारहाण केली. ही मारहाणीची हॉटेलमधील सीसीटीव्हीत कैद झाली आहे. यानंतर सचदेव यांनी उल्हासनगर पोलीस ठाणे गाठत तक्रार दाखल केली. सचदेव यांच्या फिर्यादीवरुन पोलिसांनी तिघांविरोधात गुन्हा दाखल करत पुढील तपास सुरु केला आहे.
