दारुच्या व्यसनाला कंटाळून तांत्रिकाच्या मदतीने पतीला संपवले, मग अपघाती मृत्यू दर्शवण्याचा प्रयत्न; पण…

शाहजहापूर : पतीच्या दारुच्या व्यसनाला कंटाळून पत्नीनेच जाऊबाईसोबत मिळून पतीला तांत्रिकाच्या मदतीने संपवल्याची घटना उत्तर प्रदेशातील शाहजहापूर येथे घडली आहे. हत्या केल्यानंतर अपघाताचा बनाव करत मृतदेह रेल्वे ट्रॅकवर फेकला. काही दिवसांपूर्वी पोलिसांना रेल्वे ट्रॅकवर तरुणाचा मृतदेह आढळून आला होता. पोलिसांनी मृतदेह ताब्यात घेत प्रकरणाचा तपास सुरु केला. तपासादरम्यान हत्येचा खुलासा झाला. याप्रकरणी पोलिसांनी पत्नीसह सहा आरोपींना अटक केली आहे. सुरजीत असे हत्या करण्यात आलेल्या तरुणाचे नाव आहे.

सुरजितला दारुचे व्यसन होते

सुरजीतला दारुचे व्यसन होते. त्यामुळे सर्व कमाई तो दारुवर खर्च करत असे. याच दरम्यान सुरजीतची पत्नी विमला आणि त्याच्या वहिनीची बरेलीतील तांत्रिक इरफानशी भेट झाली.

पती दारु सोडत नसल्यामुळे काटा काढला

इरफानने तंत्र-मंत्राच्या सहाय्याने दारुचे व्यसन दूर करण्याचे आश्वासन दिले. मात्र सुरजितचे दारुचे व्यसन सुटतच नव्हते. यानंतर पत्नी विमला आणि वहिनीने तांत्रिकाला पतीला ठार मारण्याची सुपारी दिली. पतीची हत्या करण्यासाठी तांत्रिकाला 2 लाख रुपये देण्याचे ठरले.

आधी अपहरण केले मग हत्या

तांत्रिकाने आपल्या चार सहकाऱ्यांसह सुरजितला दारु पिण्याच्या बहाण्याने बोलावले. मग त्याचे अपहरण करुन त्याची बरेली येथे नेऊन हत्या केली. हत्या केल्यानंतर अपघाती मृत्यू दर्शवण्यासाठी मृतदेह रेल्वे ट्र्रॅकवर फेकला.

नातेवाईकांना संशय आल्याने प्रकरण उघड

यानंतर हत्येच्या सुपारीतील उरलेले पैसे घेण्यासाठी तांत्रिक विमलाकडे आल्यानंतर नातेवाईकांना संशय आला. नातेवाईकांनी तांत्रिकाला पोलिसांच्या स्वाधीन केले. पोलिसांनी तांत्रिकाची कसून चौकशी केली असता त्याने हत्येची कबुली दिली.

पोलिसांकडून सहा आरोपींना अटक

यानंतर संपूर्ण प्रकरणाचा खुलासा झाला. पोलिसांनी सुरजित पत्नी, वहिनीसह सहा लोकांना अटक केली आहे. पतीचे दारुचे व्यसन सुटत नसल्याने पत्नीने त्याचा काटा काढण्याचे ठरवले. त्याप्रमाणे तांत्रिकाच्या मदतीने तिने पतीला संपवले.