मुंबई : पत्नी माहेरी निघून गेली आणि वारंवार विनवण्या करुनही घरी परत येत नाही, म्हणून पतीने क्रौर्याची परिसीमा गाठली. आरोपी बापाने स्वत:च्या मुलीला फासावर लटकवण्याचा प्रयत्न केला. मुलगा मेला आणि मुलगी गळफास घेतेय लवकर मुंबईत परत ये, अशी धमकी त्याने पत्नीला दिली होती. मुंबईतील मालाडच्या कुरार परिसरात रविवारी हा धक्कादायक प्रकार घडला आहे. या प्रकरणी पोलिसांनी आरोपी अजय गौड याला अटक केली आहे. पोलिसांनी त्याच्या तावडीतून दोन्ही मुलांची सुटका केली.
काय आहे प्रकरण?
अजय गौड याला नशा करण्याचे व्यसन आहे. त्यातच तो पत्नी आणि दोन मुलांना बेदम मारहाण करायचा. या त्रासाला कंटाळून त्याची पत्नी दोन वर्षांपूर्वी दोन्ही मुलांना घेऊन उत्तर प्रदेश येथील गावी निघून गेली होती. मात्र, काही दिवसांपूर्वी तेरा वर्षांची मुलगी आणि आठ वर्षांचा मुलगा यांना घेऊन अजय मुंबईत परतला होता. त्यानंतर नशेत पुन्हा त्याने मुलांना मारहाण करण्यास सुरुवात केली.
पंख्याला लटकवून जीवे मारण्याचा प्रयत्न
गौड याचा भाऊ सूचित याने कुरार पोलिसांना तक्रार दिली होती. अजयने त्याच्या तेरा वर्षांच्या मुलीला प्लास्टिकच्या बालदीवर उभे करत तिच्या गळ्यात ओढणीने फास टाकत पंख्याला लटकवून जीवे मारण्याचा प्रयत्न केला, असे तक्रारीत म्हटले होते. सूत्रांच्या म्हणण्यानुसार, मुलीला तो पाया खालील बादली हटवण्यास सांगत होता. तसं करण्यास तिने नकार दिल्यावर त्याने पंखा सुरू करण्याची धमकी दिली आणि मुलगी घाबरून ओरडू लागली. तिचा आवाज ऐकून शेजाऱ्यांनी घरी धाव घेत अजयला अडवले.
“मुलगा मेला आणि मुलगी गळफास घेतेय”
कुरार पोलिसांनी अजय गौड याच्या ताब्यातून दोन मुलांची सुटका केली आणि अजयला अटक केली, अशी माहिती कुरार पोलीस ठाण्याचे वरिष्ठ पोलीस निरीक्षक प्रकाश बेले यांनी दिली. अजय गौड याने मुलालाही जमिनीवर झोपवून त्याच्या अंगावर सफेद चादर टाकत दोन्ही मुलांचे फोटो काढले व पत्नीला पाठवले. मुलगा मेला आणि मुलगी गळफास घेतेय लवकर मुंबईत परत ये, अशी धमकी त्याने पत्नीला दिली होती.
संबंधित बातम्या :
वेडा म्हणून वारंवार चिडवल्याने तरुणाची काठीने मारहाण, सात जणांकडून तरुणाचीच हत्या
अभ्यासावरुन रागावणाऱ्या आईची मुलीकडून हत्या, आत्महत्या केल्याचा बनाव
