Gondia Gang rape : 35 वर्षीय महिलेवर गँगरेप! 26 दिवसानंतरही मुख्य आरोपी मोकाट, सामाजिक संघटनांची निदर्शनं
Gondia Crime News : गोंदिया गँगरेप प्रकरणी आतापर्यंत पोलिसांनी दोोघांना अटक केली आहे. त्यांची कसून चौकशी सुरु आहे. पण मुख्य आरोपीला पकडण्यात पोलिसांना अजूनही यश मिळू शकलेलं नाही. यासाठी 24 सामाजिक संघटना एकत्र आल्या आणि त्यांनी धरणं आंदोलन केलं होतं.
गोंदिया : गँगरेप प्रकरणातील (Gondia Bhandara Gang rape case) मुख्य आरोपीला (Main Accused in rape case) पकडण्यात पोलिसांना (Gondia Police) यश न आल्यानं सामाजिक संघटना आक्रमक झाल्यात. त्यांनी निदर्शनं करत पोलिसांच्या कार्यक्षमेतवर सवाल उपस्थित केलेत. गोंदियात 35 वर्षीय महिलेवर सामूहिक अत्याचार करण्यात आला. या प्रकरणाचा गुन्हा दाखल होऊन आता 26 दिवसही उलटून गेले. पण तरिही पोलिसांच्या हातावर तुरी देत मुख्य आरोपी मोकाटच आहे. मुख्य संशयित आरोपीचं रेखाचित्रही जारी करण्यात आलं. तसंच एसआयटी (विशेष तपास पथक) स्थापन करण्यात आली. मात्र तरिही मुख्य आरोपीला अटक करण्यात विलंब का होतोय, असा सवाल सामाजिक कार्यकत्यांनी उपस्थित केलाय. या बाबीवर लक्ष वेधण्यासाठी रविवारी धरणं आंदोलन करण्यात आलं होतं.
24 सामाजिक संस्थांची एकत्रित हाक!
गोंदिया गँगरेप प्रकरणी आतापर्यंत पोलिसांनी दोघांना अटक केली आहे. त्यांची कसून चौकशी सुरु आहे. पण मुख्य आरोपीला पकडण्यात पोलिसांना अजूनही यश मिळू शकलेलं नाही. यासाठी 24 सामाजिक संघटना एकत्र आल्या आणि त्यांनी धरणं आंदोलन केलं. या आंदोलनावेळी सामाजिक संघटनांनी घटनेचा तीव्र निषेध केला. तसंच मुख्य आरोपीला लवकरात लवकर अटक करावी, अशी मागणीही केली.
नेमकं काय आहे प्रकरण?
मदतीचे आश्वासन देऊन गोंदिया आणि भंडाऱ्यात सामूहिक बलात्कार करण्यात आलेला होता. गोंदियातील 35 वर्षीय महिलेवर तीन नराधमांनी वेगवेगळ्या ठिकाणी नेत संतापजनक कृत्य केलेलं होतं. अत्याचार केल्यानंतर पीडितेला रस्त्याकाठी फेकण्यात आल्याचा धक्कादायक प्रकारही उघडकीस आला होता. पीडितेवर सध्या नागपुरातील वैद्यकीय महाविद्यालयात उपचार सुरु आहे. पोलिसांनी या प्रकरणी दोन आरोपीना अटक केली आहे. मात्र पहिला आणि मुख्य आरोपी, ज्याने महिलेवर गोंदिया येथे अत्याचार केला, तो अजूनही फरार आहे.
या संतापजनक घटनेचं गांभीर्य ओळखून एसआयटीही स्थापन करण्यात आलेली होती. दरम्यान आता नेमकी मुख्य आरोपीला अटक केव्हा होते, याकडे सगळ्यांचं लक्ष लागलंय. गँगरेपच्या घटनेला 26 दिवस उलटून गेले तरी अजून एसआयटी आणि पोलिसांकडून मुख्य आरोपीचा शोध सुरुच आहे.
