Umesh Yadav : क्रिकेटर उमेश यादवची फसवणूक, मॅनेजर विरोधात गुन्हा दाखल
आर्थिक फसवणूक झाल्या प्रकरणी उमेश यादव याने नागपुरातील कोराडी पोलीस स्थानकामध्ये तक्रार दाखल केली आहे. उमेशचा जुन्या मॅनेजरनेच त्याची फसवणूक केल्याचे उघड झाले आहे.
नागपूर : भारतीय संघाचा फास्ट बॉलर उमेश यादव याची तब्बल 44 लाख रुपयांची आर्थिक फसवणूक झाल्याचे उघडकीस आले आहे. आर्थिक फसवणूक झाल्या प्रकरणी उमेश यादव याने नागपुरातील कोराडी पोलीस स्थानकामध्ये तक्रार दाखल केली आहे. उमेशचा जुन्या मॅनेजरनेच त्याची फसवणूक केल्याचे उघड झाले आहे. शैलेश ठाकरे असे फसवणूक करणाऱ्या मॅनेजरचे नाव आहे. ठाकरे विरोधात पोलिसांनी गुन्हा दाखल केला असून, आरोपीचा शोध घेण्यात येत आहे.
उमेश यादवचे आर्थिव व्यवहार पहायचा शैलेश ठाकरे
उमेश यादव याला भारतीय क्रिकेट संघात निवड झाल्याने त्याला देशात आणि देशाबाहेर खेळण्यासाठी जावे लागते. यामुळे त्याने त्याचा मित्र असलेला आरोपी शैलेश ठाकरे याला पत्रव्यवहार, इन्कम टॅक्स, बँकेचे व इतर व्यवहाराकरीता पगारी मॅनेजर म्हणून ठेवले होते.
उमेशच्या खात्यातील 44 लाख रुपये परस्पर काढून घेतले
आरोपीने उमेश यादव याची कोणतीही कामे केली नाही. तसेच उमेश यादव याने प्रॉपर्टी खरेदी करण्यासाठी कोराडी हद्दीतील एमएसईबी कॉलनी येथील स्टेट बँक शाखेतील खात्यात एकूण 44 लाख रुपये ठेवले होते. ते 44 लाख रुपये शैलेश ठाकरे याने परस्पर काढून स्वतःच्या नावे प्रॉपर्टी खरेदी केली. उमेश यादव यांना पैसे परत दिले नाही आणि फसवणूक केली.
शैलेश ठाकरेविरोधात कोराडी पोलिसात गुन्हा दाखल
कोराडी पोलिसांनी याप्रकरणी कलम 406, 420 भादवी अन्वये गुन्हा दाखल केला आहे. पोलीस आरोपी शैलेश ठाकरेचा शोध घेत आहेत. या घटनेमुळे सर्वांनाच धक्का बसला आहे.
