भाजप आमदार गणपत गायकवाड गोळीबार प्रकरणात मोठा ट्विस्ट, पोलीस स्टेशन बाहेरील CCTV फुटेज समोर

मुंबई : कल्याण पूर्वचे भाजपचे आमदार गणपत गायकवाड गोळीबार प्रकरणाची राज्यभर चर्चा होत आहे. पोलीस चौकीमध्ये गणपत गायकवाड यांनी गोळीबार केला. शिंदे गटाचे नेते आणि माजी नगरसेवक महेश गायकवाड यांच्यावर गोळीबार झाला. या गोळीबाराचा व्हिडीओ सोशल मीडियावर व्हायरल झाला आहे. अशातच आता आणखीन एक व्हिडीओ समोर आला आहे, ज्यामध्ये दिसत आहे की पोलीस चौकीबाहेर नेमकं काय घडलं होतं. धक्काबुक्की कोणी केली याचा खुलासा या व्हिडीओमधून झाला आहे.

हिल लाईन पोलीस स्थानकाच्या बाहेरचं सीसीटीव्ही फुटेज समोर आलं आहे. आमदार गणपत गायकवाड यांचा मुलगा वैभव गायकवाड आणि त्याचे सहकारीने धक्काबुक्की वाद घालत असल्याचं दिसत आहे. वैभव गायकवाड सह इतर सहकारी वाद घालत असून पोलीस मध्यस्थी करत असल्याचंही सीसीटीव्हीमध्ये कैद  झालं आहे. जेव्हा आमदार गणपत गायकवाड यांनी आतमध्ये गोळीबार केला तेव्हा महेश गायकवाड यांना वाचवण्यासाठी गेलेल्या सुरक्षारक्षकाला आमदार गायकवाड यांच्या भाच्याने खेचून मारहाण केल्याचंही सीसीटीव्हीत कैद झालं आहे.

गणपत गायकवाड यांनी गोळीबार केल्यावर आपली प्रतिक्रिया देताना, माझ्या मुलाला पोलीस स्टेशनमधून बाहेर जाताना धक्कबुक्की केली गेली. महेश गायकवाड याने पोलीस स्टेशन बाहेर चारशे जणांना जमा केलं होतं. माझ्या मुलांना पोलीस ठाण्यात पोलिसांसमोर मारत असतील तर मग मी काय करणार? माझं आत्मसंरक्षण करण्यासाठी मला हे करणं गरजेचं असल्याचं आमदार गायकवाड यांनी सांगितलं होतं.

गणपत गायकवाड यांच्यावर ॲट्रॉसिटी अंतर्गत गुन्हा दाखल

उल्हासनगर-हिल लाईन पोलीस ठाण्यात आमदार गणपत गायकवाड यांच्यावर ॲट्रॉसिटी अंतर्गत गुन्हा दाखल करण्यात आला आहे. द्वारली गावातील जमीन मालकाला जातीवाचक शब्द वापरल्याने आमदारांसह इतर सात जणांवर गुन्हा दाखल झालाय. त्यामुळे गणपत गायकवाड यांच्या अडचणीच वाढ झाली आहे. गोळीबार प्रकरणी गायकवाड यांना ११ दिवसांची पोलीस कोठडी सुनावण्यात आली आहे.