मळणी करताना यंत्रात स्कार्फ अडकल्याने अपघात, महिलेचे डोके शरीरापासून वेगळे…

पुण्याच्या भोर तालुक्यातील केंजल गावात मळणी करताना स्कार्फ यंत्रात अडकल्याने २४ वर्षीय महिलेचे डोके धडापासून वेगळे झाल्याचे धक्कादायक घटना घडली आहे. सावित्रा पांडुरंग गायकवाड असं मृत्यू झालेल्या महिलेच नाव आहे. राजगड पोलिसांनी दिलेल्या माहितीनुसार, सावित्रा गायकवाड गेल्या पाच वर्षांपासून आपल्या कुटुंबासह केंजळ येथील मयूर चव्हाण यांच्या शेतात मजुरी करून उदरनिर्वाह करत होत्या. शनिवारी सायंकाळी सावित्रा आणि तिचे पती पांडुरंग गायकवाड यांनी गावातील नितीन बाठे यांचे मळणी यंत्र बोलावून शेतातील बाजरी भरडण्याचे काम सुरू असताना ही दुर्दैवी घटना घडली आहे.

मळणी यंत्राद्वारे बाजरी भरडताना सावित्रा मशिनमध्ये पडलेली बाजरीची कणसे उचलत होती. यावेळी त्यांच्या डोक्याला बांधलेला स्कार्फ आणि केस ट्रॅक्टर आणि मळणी यंत्राला जोडणाऱ्या फिरत्या रॉडमध्ये अडकले. यामुळे तिचे डोके फिरत्या रॉडमध्ये ओढले गेले आणि अक्षरशः शरीरापासून वेगळे झाले. या भयंकर घटनेत सावित्राचा जागीच मृत्यू झाला.

घटनेची माहिती मिळताच, राजगड पोलीस घटनास्थळी दाखल झाले. त्यांनी घटनास्थळाचा पंचनामा केला आणि मृतदेह ताब्यात घेऊन भोर येथील उपजिल्हा रुग्णालयात शवविच्छेदनासाठी पाठवला. याप्रकरणी पोलिसांनी तपास सुरू केला असून, मळणी यंत्राच्या सुरक्षिततेच्या निकषांचाही तपास केला जाणार आहे. स्थानिकांनी मळणी यंत्रासारखी यंत्रसामग्री वापरताना सुरक्षिततेच्या उपाययोजनांवर भर देण्याची गरज व्यक्त केली आहे.