SSC Exam 2026 : पोरांनो कॉपी कराल तर मोठं नुकसान, यंदा इयत्ता 10 वीची परीक्षा कॉपीमुक्त करण्यासाठी खास मोहीम!
येत्या 20 फेब्रुवारी रोजीपासून इयत्ता दहावीची परीक्षा होणार आहे. या परीक्षा कॉपीमुक्त असाव्यात यासाठी विशेष प्रयत्न केले जात आहेत. राज्यात 16 लाख 15 हजार 489 विद्यार्थ्यांनी या परीक्षांची नोंदणी केलेली आहे.
SSC Exam 2026 : राज्यात महाराष्ट्र राज्य माध्यमिक व उच्च माध्यमिक शिक्षण मंडळातर्फे इयत्ता बारावीच्या परीक्षा घेतल्या जात आहेत. या परीक्षेदरम्यान अनेक ठिकाणी कॉपी केल्याचा प्रकार समोर आला आहे. हीच बाब लक्षात घेता इयत्ता दावीच्या परीक्षांमध्ये असे गैरप्रकार घडू नयेत म्हणून विशेष काळजी घेतली जात आहे. कॉपी करण्याच्या घटना कमी व्हाव्यात यासाठी शिक्षण मंडळातर्फे प्रयत्न केले जात आहेत. सोबतच अशा गैरप्रकारांत कोणी आढळल्यास त्यांच्याविरोधात कठोर कारवाई केली जाणार आहे.
16 लाख 15 हजार 489 विद्यार्थ्यांनी नोंदणी केली
महाराष्ट्र राज्य माध्यमिक व उच्च माध्यमिक शिक्षण मंडळाचे अध्यक्ष नंदकुमार बेंडसे यांनी पत्रकार परिषद घेऊन इयत्ता दहावीच्या विद्यार्थ्यांच्या परीक्षेबद्दल सविस्तर माहिती दिली. यावेळी बोलताना त्यांनी कॉपीच्या प्रकारांवरही भाष्य केलं. 20 फेब्रुवारी ते 18 मार्च 2026 दरम्यान इयत्ता दहावीची परीक्षा होणार आहे. या परीक्षेसाठी 16 लाख 15 हजार 489 विद्यार्थ्यांनी नोंदणी केलेली आहे. यात 8 लाख 65 हजार 740 मुले तर 7 लाख 49 हजार 736 मुली आहेत. यावेळी १३ ट्रान्सजेंडर इयत्ता दहावीची परीक्षा देणार आहेत अशी माहिती बेंडसे यांनी दिली.
कॉपीमुक्त अभियानासाठी विशेष प्रयत्न
26 हजार 683 शाळांमधून विद्यार्थ्यांची नोंदणी झाली असून 511 मुख्य केंद्रावर परीक्षा होणार आहे. यावेळी परीक्षा कॉपीमुक्त व्हावी यासाठी विशेष अभियान राबवले जाणार आहे. सोशल मीडियाचा वापर करून विद्यार्थ्यांना, शिक्षकांना, पालकांना योग्य संदेश पाठवण्यात येणार आहे. 33 हजार शिक्षक कर्मचारी, मुख्याध्यापक यांना कॉपीमुक्त अभियाना संदर्भात ई-मेल, एसएमएस, व्हॉट्सअॅपद्वारे कळविण्यात आलेले आहे.
554 परीक्षा केंद्रावर सीसीटीव्ही नाहीत
कॉफीमुक्त अभियाना अंतर्गत संदेश देण्यासाठी समाजातील मान्यवरांचे व्हिडिओ मंडळाच्या सोशल मीडिया प्लॅटफॉर्मवर प्रसिद्ध करण्यात आले आहेत. 554 परीक्षा केंद्रावर सीसीटीव्ही नाहीत, असेही बेंडसे यांनी यावेळी सांगितले.
सामूहिक कॉपीप्रकरणी २६ कर्मचारी निलंबित
दुसरीकडे महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात येणाऱ्या इयत्ता बारावीच्या परीक्षेत वाशीम जिल्ह्यातील श्री मैनागिरी महाराज विद्यालय आणि कनिष्ठ महाविद्यालय टो-जुमडा येथे सामूहिक कॉपी केल्याचा धक्कादायक प्रकार समोर आला आहे. राज्य मंडळाने आणि जिल्हा दक्षता समितीने ही कठोर कारवाई केली आहे. या प्रकरणी २६ जणांना निलंबित करण्यात आले असून त्यांच्या विरोधात पोलिसात गुन्हा दाखल करण्याच्या सूचना दिल्या आहेत. इयत्ता बारावीच्या भौतिकशास्त्र विषयाच्या पेपरदरम्यान वाशीम जिल्ह्यातील श्री. मैनागिरी महाराज विद्यालय व कनिष्ठ महाविद्यालय टो-जुमडा या परीक्षा केंद्रावर भौतिकशास्त्र विषयाचा पेपर सुरू असताना हा प्रकार घडला.
