थिएटर रिकामे पण कथेने गाजवलं बॉक्स ऑफिस, 150 कोटीच्या चित्रपटाची पहिल्याच दिवशी प्रचंड कमाई, थेट…
व्हॅलेंटाईन डेच्या एक दिवस आधी प्रदर्शित झालेल्या 150 कोटीच्या या चित्रपटाने पहिल्याच दिवशी केली प्रचंड कमाई. शाहिद कपूरने त्याच्याच चित्रपटाचा मोडला रेकॉर्ड.
O Romeo Opening Collection: 2026 मध्ये बॉलिवूडमधील अनेक मोठ्या बजेटचे चित्रपट प्रदर्शित झाले. मात्र, नुकताच असा एक चित्रपट प्रदर्शित झाला, ज्याची अॅडव्हान्स बुकिंग अपेक्षेइतकी दमदार नसतानाही त्याला चांगला प्रतिसाद मिळाला आहे. पहिल्याच दिवशीच्या कमाईचे सुरुवातीचे आकडे पाहता निर्माते आणि स्टारकास्टसाठी ही आनंदाची बाब ठरली आहे.
विशेष म्हणजे मुंबईत या चित्रपटाचे डझनभर शो रद्द करण्यात आले होते, तरीही बॉक्स ऑफिसवर चित्रपटाने समाधानकारक सुरुवात केली. ट्रेड रिपोर्ट्सनुसार वीकेंड आणि नाईट शोच्या कमाईनंतर हा आकडा आणखी वाढण्याची शक्यता वर्तवली जात आहे.
या चित्रपटाचं आणखी एक मोठं आकर्षण म्हणजे दिग्दर्शक विशाल भारद्वाज आणि अभिनेता शाहिद कपूर यांची पुन्हा एकदा जुळलेली जोडी. याआधी दोघांनी एकत्र काम केलेल्या हैदर आणि कमीने या चित्रपटांना प्रेक्षकांचा उत्तम प्रतिसाद मिळाला होता. त्यामुळे या नव्या चित्रपटाकडूनही मोठ्या अपेक्षा व्यक्त केल्या जात आहेत. दमदार स्टारकास्ट आणि वेगळी प्रेमकहाणी ही या चित्रपटाची चांगली बाजू ठरत आहे.
पहिल्याच दिवशी चित्रपटाने बॉक्स ऑफिसवर 8.25 कोटी रुपयांची कमाई करत चांगली ओपनिंग केली. व्हॅलेंटाईन वीकचा फायदा या चित्रपटाला होण्याची शक्यता व्यक्त केली जात आहे. कारण चित्रपटात एक वेगळी आणि भावनिक लव्ह स्टोरी दाखवण्यात आली आहे. त्यासोबतच प्रेक्षकांना आकर्षित करणारे अॅक्शन सीन पाहायला मिळत आहेत, जे सध्या तरुण प्रेक्षकांच्या पसंतीस उतरत आहेत.
अभिनेत्याने त्याच्याच चित्रपटाचा मोडला रेकॉर्ड
या चित्रपटाने शाहिद कपूरच्या करिअरमधील एक विक्रमही मोडला आहे. ‘ओ रोमियो’च्या पहिल्या दिवसाच्या कमाईने त्याच्या मागील देवा या चित्रपटापेक्षा सरस कामगिरी केली आहे. ‘देवा’ने पहिल्या दिवशी सुमारे 5.50 कोटी रुपयांची कमाई केली होती तर नव्या चित्रपटाने त्यापेक्षा चांगली सुरुवात केली आहे. त्यामुळे निर्मात्यांसाठी ही दिलासादायक बाब मानली जात आहे. विशेष म्हणजे या चित्रपटाच्या निर्मितीसाठी सुमारे 125 ते 150 कोटी रुपयांचा खर्च करण्यात आला असून तो वसूल करणे चित्रपटासाठी महत्त्वाचे ठरणार आहे.
चित्रपटाची कथा 90च्या दशकातील मुंबई अंडरवर्ल्डच्या पार्श्वभूमीवर आधारित आहे. गुन्हेगारी, सत्तासंघर्ष आणि प्रेम यांचा संगम यात पाहायला मिळतो. शाहिद कपूरने ‘उस्तारा’ नावाच्या धोकादायक कॉन्ट्रॅक्ट किलरची भूमिका साकारली आहे.
