कतरिना पुढं दिशा पाटनी फेल, ‘ऊंचा लंबा कद’च्या नवीन वर्जन रिलीज, गाणं पाहून चाहते नाराज

बॉलिवूड अभिनेत्री कतरिना कैफ गेल्या काही काळापासून मोठ्या पडद्यापासून दूर असली तरी तिची लोकप्रियता आजही कायम आहे. दरम्यान, आगामी ‘वेलकम टू द जंगल’ या चित्रपटातील ‘ऊंचा लंबा कद फॉरएव्हर’ हे गाणे प्रदर्शित झाले असून, या गाण्याने प्रेक्षकांना पुन्हा एकदा जुन्या आठवणींमध्ये नेले आहे. विशेष म्हणजे, गाण्याच्या शेवटी अभिनेता अक्षय कुमारने कतरिनाची घेतलेली आठवण सध्या सोशल मीडियावर चर्चेचा विषय ठरत आहे.

सोमवारी प्रदर्शित झालेले ‘ऊंचा लंबा कद फॉरएव्हर’ हे गाणे 2007 मध्ये प्रदर्शित झालेल्या Welcome या चित्रपटातील लोकप्रिय ‘ऊंचा लंबा कद’ गाण्याचे रीमिक्स व्हर्जन आहे. मूळ गाण्यात अक्षय कुमार आणि कतरिना कैफ यांची जोडी झळकली होती. त्या गाण्यातील कतरिनाचे डान्स मूव्ह्ज आजही चाहत्यांच्या पसंतीस उतरतात.

नव्या व्हर्जनमध्ये अक्षय कुमारसोबत अभिनेत्री दिशा पटानी दिसत आहे. दुबईमध्ये चित्रित करण्यात आलेल्या या गाण्यात दोघांनी आकर्षक डान्स परफॉर्मन्स सादर केला आहे. मात्र, गाण्याच्या शेवटी अक्षय कुमारने कतरिना आम्हाला तुझी आठवण येतेय असे म्हणत चाहत्यांचे लक्ष वेधून घेतले.

चाहत्यांना जाणवली कतरिनाची उणीव

गाणे प्रदर्शित होताच सोशल मीडियावर चाहत्यांकडून विविध प्रतिक्रिया उमटू लागल्या. अनेकांनी नव्या गाण्याचे कौतुक केले असले तरी कतरिनाची कमतरता स्पष्टपणे जाणवल्याचे मत व्यक्त केले. एका चाहत्याने प्रतिक्रिया देताना म्हटले, दिशाविषयी कोणतीही नाराजी नाही, पण कतरिनाची जागा कोणीच घेऊ शकत नाही. तर दुसऱ्या एका युजरने ओरिजिनल गाणेच सर्वोत्तम होते असे लिहिले. आणखी एका नेटकऱ्याने बॉलिवूडमध्ये नवीन कल्पना संपल्या आहेत का? सतत जुन्याच गाण्यांचे रीमिक्स केले जात आहेत अशी टीकाही केली.

‘वेलकम टू द जंगल’ हा ‘वेलकम’ फ्रँचायझीमधील तिसरा चित्रपट आहे. याआधी प्रदर्शित झालेल्या शीर्षक गीताच्या रीमिक्सला प्रेक्षकांचा चांगला प्रतिसाद मिळाला होता. तसेच ‘घिस घिस घिस’ आणि ‘ऊंचा लंबा कद फॉरएव्हर’ या गाण्यांनाही चाहत्यांकडून पसंती मिळत आहे. चित्रपटात अॅक्शन, कॉमेडी आणि सस्पेन्सचा तिहेरी संगम पाहायला मिळणार आहे. विशेष म्हणजे या चित्रपटात मोठी स्टारकास्ट झळकणार आहे.