शिंदेंचा फोन अन् अरबाज शेखला मोठा दिलासा, सोलापुरातील त्या हॉस्पिटलने घेतला मोठा निर्णय

‘सैराट’ चित्रपटातून प्रसिद्धी मिळवलेला अभिनेता अरबाज शेख याच्या वडिलांच्या उपचारासाठी सोलापुरातील एस पी न्युरोसायन्स सेंटरचे डॉ. अश्विन वळसंगकर यांनी पुढाकार घेत संपूर्ण वैद्यकीय मदत करण्याचा निर्णय घेतला आहे. त्यामुळे अरबाज शेख आणि त्याच्या कुटुंबाला मोठा दिलासा मिळाला आहे.

अरबाज शेख याच्या वडिलांना काही दिवसांपूर्वी ब्रेन हॅमरेज झाल्यानंतर सोलापुरातील एका खासगी रुग्णालयात त्यांच्यावर उपचार सुरू होते. मात्र या उपचारासाठी मोठा आर्थिक खर्च झाल्याने कुटुंबासमोर गंभीर आर्थिक संकट उभे राहिले. यासंदर्भात अरबाज शेखने सोशल मीडियावर एक भावनिक व्हिडिओ शेअर करत उपचारासाठी आर्थिक मदतीची गरज व्यक्त केली होती. तसेच काही खासगी रुग्णालयांकडून रुग्णांची आर्थिक लूट होत असल्याचाही मुद्दा त्याने मांडला होता.

एकनाथ शिंदेंच्या पदाधिकाऱ्यांनी घेतली अरबाजची भेट

अरबाज शेखचा हा व्हिडिओ सोशल मीडियावर मोठ्या प्रमाणात व्हायरल झाला. या प्रकरणाची दखल राज्याचे उपमुख्यमंत्री एकनाथ शिंदे यांनी घेत शिवसेना वैद्यकीय मदत कक्षाच्या पदाधिकाऱ्यांना तातडीने सोलापुरात जाऊन अरबाज शेखच्या कुटुंबाची भेट घेण्याच्या सूचना दिल्या.

उपमुख्यमंत्र्यांच्या निर्देशानुसार शिवसेना वैद्यकीय मदत कक्षाच्या पदाधिकाऱ्यांनी अरबाज शेखची भेट घेऊन त्यांच्या वडिलांच्या प्रकृतीची सविस्तर माहिती घेतली. तसेच पुढील उपचारांसाठी आवश्यक ती वैद्यकीय मदत उपलब्ध करून देण्याबाबत चर्चा करण्यात आली.

डॉ. अश्विन वळसंगकर यांचा सकारात्मक प्रतिसाद

यावेळी शिवसेना वैद्यकीय मदत कक्षाच्या पदाधिकाऱ्यांनी सोलापुरातील एस पी न्युरोसायन्स सेंटरचे डॉ. अश्विन वळसंगकर यांच्याशी संपर्क साधून अरबाज शेखच्या वडिलांच्या उपचारासाठी सहकार्य करण्याची विनंती केली. या विनंतीला सकारात्मक प्रतिसाद देत डॉ. अश्विन वळसंगकर यांनी उपचारासाठी आवश्यक ती संपूर्ण वैद्यकीय मदत करण्याचे मान्य केले.

डॉ. वळसंगकर यांच्या या निर्णयामुळे अरबाज शेखच्या कुटुंबाला मोठा आधार मिळाला असून, पुढील उपचार अधिक प्रभावीपणे होण्यास मदत होणार आहे. सामाजिक बांधिलकी जपत गरजू रुग्णांना मदतीचा हात देण्याच्या या उपक्रमाचे विविध स्तरांतून स्वागत करण्यात येत आहे.