Ajith Kumar Fan Dies: अजीत कुमारच्या चाहत्याचा दुर्दैवी मृत्यू; चालत्या गाडीतून मारली उडी
थिएटरबाहेर फटाके फोडून आणि डान्स करून त्यांनी आनंद साजरा केला. मात्र या जल्लोषादरम्यान एका चाहत्याचा दुर्दैवी मृत्यू झाला. ही घटना तमिळनाडूमध्ये घडली आहे.
(Ajith Kumar Fan Dies) चेन्नई: तमिळ चित्रपटांमधील सुपरस्टार अजीत कुमारच्या ‘थुनिवू’ या चित्रपटाची चाहते आतुरतेने वाट पाहत होते. हा चित्रपट प्रदर्शित झाल्यानंतर बरेच चाहते थिएटरमध्ये पोहोचले. थिएटरबाहेर फटाके फोडून आणि डान्स करून त्यांनी आनंद साजरा केला. मात्र या जल्लोषादरम्यान एका चाहत्याचा दुर्दैवी मृत्यू झाला. ही घटना तमिळनाडूमध्ये घडली आहे. तमिळनाडूमधल्या एका थिएटरमध्ये अजीत कुमारच्या थुनिवू हा चित्रपटाचा शो लागला होता. अजीतला मोठ्या पडद्यावर पाहण्यासाठी चाहत्यांनी तुफान गर्दी केली होती.
चित्रपटाच्या प्रदर्शनाचा आनंद साजरा करताना चाहत्यांनी थिएटरबाहेर फटाके फोडले आणि डान्स केला. अजीत कुमारच्या या चित्रपटासोबतच थलपती विजयचा ‘वारिसु’ हा चित्रपटसुद्धा प्रदर्शित झाला. त्याचे चाहतेसुद्धा मोठ्या संख्येने तिथे जमा झाले. मात्र यादरम्यान एक दुर्घटना घडली. अजीत कुमारच्या एका चाहत्याचा यात मृत्यू झाला.
#WATCH | Chennai, Tamil Nadu: Fans of actor Ajith Kumar and of actor Vijay burst firecrackers, dance and celebrate outside a movie theatre as they gather to watch the former’s #Thunivu and the latter’s #Varisu
Both films have released on the same day after 8 years. pic.twitter.com/3YKX2gtMRe
— ANI (@ANI) January 11, 2023
एएनआयने दिलेल्या वृत्तानुसार, भरत कुमार नावाच्या व्यक्तीचा मृत्यू झाला. अजीतचा चित्रपट प्रदर्शित झाल्यानिमित्त तो इतका उत्साहित झाला की त्याने चालत्या लॉरीमधून उडी मारली. ही लॉरी धीम्या गतीनेच चालत होती. मात्र वरून उडी मारल्याने भरत कुमार गंभीर जखमी झाला आणि त्याचा मृत्यू झाला.
ही घटना चेन्नईमधील रोहिणी थिएटरजवळ पूनमल्ली हायवेवर घडली. अजीत कुमारचा हा चाहता पहाटे 1 वाजता चित्रपट पाहण्यासाठी गेला होता, अशी माहिती पोलिसांनी दिली. थुनिवू हा चित्रपट 11 जानेवारी रोज प्रदर्शित झाला. यामध्ये अजीत कुमारसोबत मंजू वॉरियर, प्रेम कुमार, पवनी रेड्डी आणि चिराग जानी यांच्याही भूमिका आहेत. बोनी कपूरने या चित्रपटाची निर्मिती केली आहे.
