मी जगभरात प्रसिद्ध झालो…बॉलिवूडच्या ‘या’ अभिनेत्यामुळे बिग बी देत होते मृत्यूशी झुंज, काय घडलेलं?

बॉलिवूडमध्ये एखाद्या कलाकाराचं आयुष्य एका क्षणात बदलू शकतं, याची अनेक उदाहरणं पाहायला मिळतात. असाच एक प्रसंग अभिनेता पुनीत इस्सर यांच्या आयुष्यात घडला. १९८२ मध्ये ‘कुली’ चित्रपटाच्या शूटिंगदरम्यान अमिताभ बच्चन यांना गंभीर दुखापत झाली होती. या अपघातानंतर पुनीत इस्सर यांच्या करिअरवर मोठा परिणाम झाला. त्यांना तब्बल सहा वर्षे काम मिळालं नाही. मात्र, पुढे ‘महाभारत’ या लोकप्रिय मालिकेतील दुर्योधनाच्या भूमिकेनं त्यांना घराघरांत ओळख मिळवून दिली.

‘कुली’च्या सेटवर नेमकं काय घडलं होतं?

१९८२ मध्ये दिग्दर्शक मनमोहन देसाई यांच्या ‘कुली’ चित्रपटाचं शूटिंग सुरू होतं. बंगळुरूमध्ये चित्रपटातील एका फाइट सीनचं शूटिंग सुरू असताना पुनीत इस्सर आणि अमिताभ बच्चन यांच्यातील एका सीनदरम्यान अपघात घडला. पुनीत यांचा बुक्का चुकून अमिताभ बच्चन यांना जोरात लागला. या अपघातात अमिताभ यांना गंभीर दुखापत झाली आणि त्यांना तातडीनं रुग्णालयात दाखल करण्यात आलं. अमिताभ बच्चन यांची प्रकृती इतकी खालावली होती की, काही काळासाठी त्यांना वैद्यकीयदृष्ट्या मृत घोषित करण्यात आल्याचं त्यांनी स्वतः आपल्या ब्लॉगमध्ये नमूद केलं होतं. त्यांच्यावर अनेक शस्त्रक्रिया करण्यात आल्या. जवळपास दोन महिने त्यांची प्रकृती चिंताजनक होती. डॉक्टरांच्या अथक प्रयत्नांनंतर त्यांची प्रकृती सुधारली आणि त्यांनी मृत्यूवर मात केली. या घटनेनं संपूर्ण देशाला धक्का बसला होता. अमिताभ बच्चन यांच्या प्रकृतीत सुधारणा व्हावी, यासाठी त्यांचे चाहते प्रार्थना करत होते.

अपघातानंतर पुनीत इस्सर यांना सहा वर्षे काम मिळालं नाही

या दुर्घटनेचा परिणाम केवळ अमिताभ बच्चन यांच्या आयुष्यावरच नव्हे, तर पुनीत इस्सर यांच्या कारकिर्दीवरही झाला. अलीकडेच एका मुलाखतीत पुनीत यांनी त्या कठीण काळातील अनुभव सांगितला. पुनीत म्हणाले की, ‘जे काही घडतं, ते चांगल्यासाठीच घडतं, यावर माझा ठाम विश्वास आहे. दुर्दैवाने तो अपघात घडला. त्यानंतर मला सहा वर्षे काम मिळालं नाही. मात्र, मी जगभरात प्रसिद्ध झालो. लोक मला अमिताभ बच्चन यांचा जीव घेता घेता राहिलेला माणूस म्हणून ओळखू लागले. तो केवळ एक अपघात होता. मी मुद्दामहून असं काहीही केलं नव्हतं. अमितजी हे सुपरस्टार आहेत आणि मी त्यांचा खूप मोठा चाहता आहे. त्या अपघातानंतरची सहा वर्षे माझ्यासाठी खूप कठीण होती. मला पाहिजे तशा भूमिका मिळत नव्हत्या. काही चित्रपटांमधूनही मला काढून टाकण्यात आलं. मात्र, यासाठी मी कोणालाही दोष देत नाही. ते माझं नशीब होतं. या सगळ्या परिस्थितीमुळे मी अधिक खंबीर झालो.’

‘मला ‘महाभारत’ मालिकेत काम करण्याची संधी मिळाली आणि मी दुष्ट दुर्योधन म्हणून ओळखला जाऊ लागलो. खरं तर, मला दुर्योधनाचीच भूमिका साकारायची होती. बी. आर. चोप्रा सरांना मात्र मला भीमाची भूमिका द्यायची होती. मी दुर्योधनाच्या भूमिकेसाठी ऑडिशन देऊ इच्छितो, असं जेव्हा मी त्यांना सांगितलं, तेव्हा ते आणि त्यांचे सहकारी आश्चर्यचकित झाले. मात्र, मी दुर्योधनाचीच भूमिका साकारण्याचा आग्रह धरला. प्रेक्षक या व्यक्तिरेखेशी इतके जोडले गेले की त्यांनी या भूमिकेला खूप चांगला प्रतिसाद दिला.’ असं पुनीत यांनी शेवटी सांगितलं. अमित भाटियाला दिलेल्या मुलाखतीत पुनीत बोलत होते.