AQI
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

सासरकडचे माझ्या पत्नीला पाठवत नाहीयेत..; अमिताभ बच्चन यांच्या हातातील बॅनर पाहून चाहते पेचात

अमिताभ बच्चन हे दर रविवारी त्यांच्या बंगल्याबाहेर चाहत्यांची भेट घेतात. या भेटीचे फोटो आणि व्हिडीओ सोशल मीडियावर खूप व्हायरल होतात. यंदाही त्यांचा असाच एक व्हिडीओ समोर आला असून यावेळी त्यांच्या हातातल्या पोस्टरने सर्वांचं लक्ष वेधलं आहे.

सासरकडचे माझ्या पत्नीला पाठवत नाहीयेत..; अमिताभ बच्चन यांच्या हातातील बॅनर पाहून चाहते पेचात
Amitabh Bachchan and Jaya BachchanImage Credit source: Twitter
| Updated on: Feb 09, 2026 | 3:55 PM
Share

बॉलिवूडचे महानायक अर्थात अभिनेते अमिताभ बच्चन हे दर रविवारी बंगल्याबाहेरील चाहत्यांची भेट घेतात. त्यांची एक झलक पाहण्यासाठी चाहते तासनतास बंगल्याबाहेर प्रतीक्षा करतात. चाहत्यांच्या भेटीसाठी बिग बीसुद्धा तितकेच आतुर असतात. त्यामुळे कधी काही कारणास्तव जर ते चाहत्यांची भेट घेऊ शकले नाहीत, तर सोशल मीडियावर पोस्ट लिहून दिलगिरी व्यक्त करतात. सध्या सोशल मीडियावर बिग बी यांचा त्यांच्या बंगल्याबाहेर एक व्हिडीओ व्हायरल होत आहे. कधीकधी त्यांच्या आजूबाजूचे लोकसुद्धा कॅमेरात कैद होतात, तर कधी चाहत्यांच्या हरकती चर्चेचा विषय ठरतात. यावेळीही असंच काहीसं झालं आहे. परंतु कारण वेगळं होतं. यावेळी बिग बींच्या हातातल्या एका पोस्टरने नेटकऱ्यांचं विशेष लक्ष वेधलं होतं. या पोस्टरवरील मजकूर वाचून नेटकरी पेचात पडले.

पापाराझी अकाऊंटवर शेअर केलेल्या या व्हिडीओमध्ये बिग बी यांच्या हातात एक पोस्टर पहायला मिळतोय. या पोस्टरवर लिहिलं होतं, ‘मला साथ द्या.. माझ्या सासरकडचे माझ्या पत्नीला पाठवत नाहीयेत. 1992 अ लव्ह मॅरेज.’ हा पोस्टर पाहून सर्वजण अवाक् झाले आहेत. नेमकी काय भानगड आहे आणि बिग बींना नेमकं काय सांगायचं आहे, असा प्रश्न नेटकऱ्यांना पडला आहे. परंतु या पोस्टरचं सत्य वेगळंच आहे. या पोस्टरचा अमिताभ बच्चन यांच्याही काहीच संबंध नाही. हा एका आगामी चित्रपटाचा प्रमोशनल पोस्टर होता, जो 13 फेब्रुवारी रोजी थिएटरमध्ये प्रदर्शित होणार आहे. बिग बींनी थोडा वेळ हा पोस्टर आपल्या हातात धरला होता आणि त्यानंतर त्यांनी तो टीमकडे परत केला. परंतु याचा व्हिडीओ सोशल मीडियावर व्हायरल झाल्यानंतर नेटकऱ्यांनी त्यावर कमेंट्सचा वर्षाव केला आहे.

कमेंट्समध्ये अनेकांनी जया बच्चन यांचा उल्लेख केला आहे. ‘अशी पत्नी असेल तर सासरीच ठीक आहे’, अशी मस्करी एकाने केली. तर ‘लांब राहणंच उत्तम आहे’, असं दुसऱ्या युजरने लिहिलं आहे. जया बच्चन या त्यांच्या तापट स्वभावासाठी ओळखल्या जातात. त्या जेव्हा कधी पापाराझींसमोर येतात, तेव्हा त्या चिडलेल्याच दिसून येतात. त्यामुळे या व्हिडीओच्या कमेंट बॉक्समध्ये नेटकऱ्यांनी जया बच्चन यांचा उल्लेख करत फिरकी घेतली आहे.