मुलाच्या ‘त्या’ एका वक्तव्याने पालटलं बॉबी देओलचं आयुष्य; बुडतं करिअर वाचवण्यासाठी केले पुन्हा प्रयत्न
बॉबी देओलने 90 च्या दशकात बॉलिवूडमध्ये पदार्पण केलं. त्याने बरसात, सोल्जर, गुप्त : द हिडन ट्रुथ, बिच्छू यांसारख्या चित्रपटांमध्ये भूमिका साकारल्या आहेत. 2000 दशकाच्या मध्यात त्याला काम मिळणं कठीण होत गेलं. किस्मत, बरदाश्त, टँगो चार्ली, अलग, झूम बराबर झूम यांसारखे त्याचे चित्रपट फ्लॉप ठरले होते.
मुंबई : 31 ऑक्टोबर 2023 | करण जोहरच्या ‘कॉफी विथ करण 8’ या चॅट शोच्या दुसऱ्या एपिसोडमध्ये अभिनेता सनी देओल आणि बॉबी देओल हजेरी लावणार आहेत. या शोमध्ये करणसोबत गप्पा मारताना बॉबी त्याच्या करिअरमधील सर्वांत कठीण काळाविषयी मोकळेपणे व्यक्त झाला. इंडस्ट्रीत काम मिळत नसल्याने बॉबीने व्यसनाधीन झाल्याची कबुली दिली. मात्र मुलाच्या एका वक्तव्यामुळे त्याने त्यातून बाहेर पडण्याचं ठरवलं.
“मी आशाच सोडली होती. मी स्वत:वरच दया करू लागलो होतो. त्यावेळी मला दारूचं व्यसन जडलं आणि मी दिवसभर घरीच बसून असायचो. लोक मला काम का देत नाही, असा सवाल करत मी स्वत:चीच कीव करत होतो. मी चांगला असतानाही त्यांना माझ्यासोबत का काम करायचं नाही, असा प्रश्न मला पडायचा. मी प्रत्येक गोष्टीबद्दल इतका नकारात्मक झालो होतो की कोणत्याच गोष्टीत मला सकारात्मक बाजू दिसत नव्हती. त्यावेळी माझी पत्नी काम करायची आणि मी घरीच बसायचो”, असं बॉबीने सांगितलं.
त्या कठीण काळात मुलाच्या एका वक्तव्याने बॉबीचं आयुष्य पालटलं होतं. याविषयी तो पुढे म्हणाला, “अचानक मी माझ्या मुलाला हे बोलताना ऐकलं की, आई.. पापा घरीच बसतात आणि तू रोज कामाला जाते. हे ऐकताच मला कसंतरी झालं. मी स्वत:लाच म्हणालो की नाही, मी अजून असं बसू शकत नाही. त्या परिस्थितीतून बाहेर पडण्यासाठी मला वेळ लागला. हा बदल रातोरात झाला नाही.”
View this post on Instagram
“माझा भाऊ, वडील, आई, बहिणी.. हे सर्वजण माझ्या पाठिशी होते. पण तुम्ही सतत एखाद्याचा हात पकडून प्रत्येक गोष्ट करू शकत नाही. तुम्हाला तुमच्या दोन पावलांवरच चालावं लागेल. हळूहळू गोष्टी बदलू लागल्या होत्या. मी माझ्या कामात अधिक लक्ष देऊ लागलो, अधिक गंभीरतेने गोष्टींकडे पाहू लागलो. मी लोकांची भेट घेऊ लागलो आणि त्यांच्याकडे काम मागू लागलो. मी तुझ्याकडेसुद्धा आलो होतो आणि आजपर्यंत तू माझ्यासोबत काम केलं नाहीस”, असं बॉबी करण जोहरलाही बोलून दाखवतो.
