Rhea Chakraborty: रिया चक्रवर्तीने अनेकदा विकत घेतला होता गांजा; सुशांत प्रकरणात NCBचा दावा

दिवंगत अभिनेता सुशांत सिंह राजपूतच्या (Sushant Singh Rajput) मृत्यूशी संबंधित ड्रग्ज प्रकरणात नार्कोटिक्स कंट्रोल ब्युरोने (NCB) मोठा खुलासा केला आहे. एनसीबीने दावा केला आहे की सुशांतची कथित गर्लफ्रेंड रिया चक्रवर्तीने (Rhea Chakraborty) तिचा भाऊ शौविकसह इतर आरोपींकडून अनेकदा गांजा विकत घेतला होता आणि तो सुशांतला दिला होता. NCB ने नुकतंच NDPS कोर्टात सुशांतच्या मृत्यू प्रकरणी 35 आरोपींविरुद्ध आरोप दाखल केला आहे. याप्रकरणी मंगळवारी सुनावणी झाली. एनसीबीने हे देखील उघड केलं की रिया चक्रवर्ती, शौविक यांच्यासह सर्व आरोपींनी मार्च 2020 ते डिसेंबर 2020 या कालावधीत षडयंत्र रचलं होतं. जेणेकरून ते बॉलिवूड आणि उच्चभ्रू सोसायटीमध्ये ड्रग्जची विक्री आणि खरेदी करु शकतील.

या कलमान्वये गुन्हा दाखल

एनसीबीने मंगळवारी दावा केला की आरोपींनी मुंबईत केवळ अंमली पदार्थांची तस्करी केली नाही तर गांजा, चरस, कोकेन यांसारख्या अंमली पदार्थांचा वापरही केला. या सर्व आरोपींविरुद्ध बेकायदेशीर तस्करी आणि गुन्हेगारांना आश्रय दिल्याबद्दल कलम 27 आणि 27 अ लागू करण्यात आले आहेत. याशिवाय कलम 28 आणि कलम 29 अन्वये गुन्हा दाखल करण्यात आला आहे.

Draft charges submitted against Rhea Chakroborty in Special NDPS court of receiving deliveries of ganja from Samuel Miranda, Showik Charoborty & Dipesh Sawant & others and handing over those deliveries to late actor Sushant Singh Rajput while making payments for them in yr 2020

— ANI (@ANI) July 13, 2022

आता पुढे काय होणार?

आरोप निश्चित करण्यापूर्वी न्यायालय सर्व आरोपींच्या दोषमुक्तीच्या अर्जावर विचार करेल. एनडीपीएस कायद्याशी संबंधित खटल्यांची सुनावणी करणारे विशेष न्यायाधीश व्ही. जी. रघुवंशी यांनी या प्रकरणाच्या सुनावणीसाठी 27 जुलैची तारीख निश्चित केली आहे. म्हणजेच आता पुढील सुनावणी 15 दिवसांनी होणार आहे.