धक्कादायक, 15 कोटींसाठी सतिश कौशिक यांचा मृत्यू?; जिथे पार्टी झाली त्याच फार्म हाऊसच्या मालकाकडून घात?
सान्वी यांनी पती विकास यांच्यावर बलात्काराचा गुन्हा दाखल केला होता. दोन महिन्यांपूर्वीच त्यांनी हा गुन्हा दाखल केला होता. त्यामुळे कौशिक प्रकरणात सान्वी जाणूनबुजून मेल पाठवत असल्याचं सांगितलं जात आहे.
नवी दिल्ली : अभिनेते सतिश कौशिक यांच्या मृत्यूप्रकरणाला नवं वळण लागताना दिसत आहे. कौशिक दिल्लीतील फॉर्म हाऊसवर होळीसाठी गेले होते. तिथे जंगी पार्टीही झाली होती. कुबेर ग्रुपचे विकास मालू हे या फार्म हाऊसचे मालक आहेत. विकास मालू यांच्या पत्नीनेच कौशिक यांच्या मृत्यूमागे आपल्या पतीचा हात असल्याचा दावा केला आहे. फार्म हाऊसच्या मालकाची पत्नी सान्वी मालू यांनी दिल्ली पोलीस आयुक्तांना चिठ्ठी लिहून हा आरोप केला आहे. त्यामुळे कौशिक यांच्या मृत्यू प्रकरणाला वेगळं वळण लागण्याची शक्यता आहे.
सान्वी मालू यांनी या चिठ्ठीत अनेक धक्कादायक आरोप केले आहे. विकास आणि सतिश कौशिक यांचं 15 कोटीच्या व्यवहारावरून भांडण झालं होतं. विकास आणि कौशिक दोघे जुने दोस्त आहेत. विदेशात एकदा कौशिक विकासकडून आपले 15 कोटी रुपये घ्यायला आले होते. त्यावरून दोघांमध्ये वाद झाला होता. नंतर पैसे देईल असं सांगून विकास यांनी त्यावेळी वेळ मारून नेली होती, असं सान्वी यांचं म्हणणं आहे.
चुकीचं औषध दिलं असावं
सान्वी यांनी कौशिक यांच्या मृत्यूमागे पतीचा हात असण्याची शक्यता वर्तवली आहे. पैसे देण्याची नौबत येऊ नये म्हणून विकासने कौशिक यांना चुकीचे औषध दिले असण्याची शक्यता आहे. त्यामुळे या अँगलची चौकशी करण्यात यावी, अशी मागणी सान्वी यांनी केली आहे.
विकासवर रेपचा गुन्हा
दरम्यान, सान्वी यांनी पती विकास यांच्यावर बलात्काराचा गुन्हा दाखल केला होता. दोन महिन्यांपूर्वीच त्यांनी हा गुन्हा दाखल केला होता. त्यामुळे कौशिक प्रकरणात सान्वी जाणूनबुजून मेल पाठवत असल्याचं सांगितलं जात आहे. विकास या प्रकरणात अडकावा यासाठी सान्वीचा प्रयत्न असावा अशी शक्यता वर्तवली जात आहे.
सतिश कौशिक यांच्या कुटुंबीयांनीही कौशिक यांच्या मृत्यूवर कोणताही संशय व्यक्त केलेला नाही. त्यामुळे सान्वी यांनी आपल्याच पतीवर आरोप केल्याने अनेकतर्क वितर्क लढवले जात आहेत. दरम्यान, पोस्टमार्टम रिपोर्टमध्ये कौशिक यांचा मृत्यू हार्ट अटॅकनेच झाल्याचं उघड झालं आहे.
