2026 चा ब्लॉकबस्टर, 9.80 कोटी बजेट असणार्या या चित्रपटाने 15 दिवसांमध्ये केली 64.95 कोटी रुपयांची कमाई
चित्रपट असावा तर असा, 2026 मध्ये प्रदर्शित झालेल्या या चित्रपटाने अवघ्या 9.80 कोटी रुपयांच्या बजेटमध्ये 15 दिवसांमध्ये केली 64.95 कोटी रुपयांची कमाई. सर्वत्र होतंय कौतुक.
Deool Band 2 Collection : मराठी चित्रपटसृष्टीत सध्या एका चित्रपटाची सर्वाधिक चर्चा होत आहे आणि तो म्हणजे दिग्दर्शक-अभिनेता प्रवीण तरडे यांचा ‘देऊळ बंद 2’ चित्रपटाची. दमदार कथा, आध्यात्मिक आशय आणि प्रेक्षकांचा उत्स्फूर्त प्रतिसाद यामुळे या चित्रपटाने बॉक्स ऑफिसवर अभूतपूर्व यश मिळवले आहे. अवघ्या 15 दिवसांत चित्रपटाने कमाईचे नवे विक्रम प्रस्थापित करत ब्लॉकबस्टरचा दर्जा मिळवला आहे.
बॉक्स ऑफिस विश्लेषक जेरिन जॉर्जकुट्टी यांनी दिलेल्या माहितीनुसार, ‘देऊळ बंद 2’ने देशांतर्गत बॉक्स ऑफिसवर आतापर्यंत सुमारे 64.95 कोटी रुपयांची ग्रॉस कमाई केली आहे. मराठी चित्रपटासाठी ही अत्यंत उल्लेखनीय कामगिरी मानली जात आहे.
महाराष्ट्रात सर्वाधिक प्रतिसाद
चित्रपटाला महाराष्ट्रात प्रेक्षकांचा प्रचंड प्रतिसाद मिळत असून, राज्यातच चित्रपटाने 63.08 कोटी रुपयांची कमाई केली आहे. याशिवाय इतर राज्यांमध्येही चित्रपटाने चांगली कामगिरी केली आहे. 15 व्या दिवसापर्यंत गोव्यातून सुमारे 87 लाख रुपये, कर्नाटकातून 60 लाख रुपये, गुजरातमधून 37 लाख रुपये तर इतर भागांतून 3 लाख रुपये इतकी कमाई झाली आहे.
‘देऊळ बंद 2’चे बजेट केवळ 9.80 कोटी रुपये असल्याचे सांगितले जाते. ‘देऊळ बंद 2’ हा 2013 मध्ये प्रदर्शित झालेल्या सुपरहिट ‘देऊळ बंद’ या चित्रपटाचा सिक्वेल आहे. या चित्रपटात मोहन जोशी, स्नेहल तरडे आणि प्रवीण तरडे यांनी प्रमुख भूमिका साकारल्या आहेत. श्री स्वामी समर्थ यांच्या कृपेचा आणि आध्यात्मिक विचारांचा संदेश हलक्याफुलक्या आणि मनोरंजक शैलीत मांडण्यात आला आहे. चित्रपटाच्या कथानकाला आणि सादरीकरणाला प्रेक्षकांची मोठी पसंती मिळत आहे.
पहिल्या दिवसापासून दमदार सुरुवात
‘देऊळ बंद 2’ने प्रदर्शनाच्या पहिल्याच दिवशी 2.45 कोटी रुपयांची नेट कमाई केली होती. तर पहिल्या विकेंडमध्ये चित्रपटाने 18.50 कोटी रुपयांचा नेट व्यवसाय करत आपली ताकद दाखवून दिली. त्यानंतरही चित्रपटाच्या कमाईचा वेग कायम राहिला.
‘जनता सिनेमा’चे संस्थापक आणि ट्रेड विश्लेषक युसुफ शेख यांनी चित्रपटाच्या यशाबद्दल प्रतिक्रिया देताना सांगितले की, ‘मराठी चित्रपट ‘देऊळ बंद 2’ने बॉक्स ऑफिसवर जबरदस्त कामगिरी केली आहे. अवघ्या दोन आठवड्यांत चित्रपटाने सुमारे 50 कोटी रुपयांची कमाई केली असून, हा मराठी चित्रपटसृष्टीसाठी अत्यंत अभिमानास्पद क्षण आहे.
