रोहित शेट्टी गोळीबार प्रकरणाचं पुणे कनेक्शन उघड, अवघ्या 10 तासात 5 जणांच्या मुसक्या आवळल्या
बॉलिवूडमधील प्रसिद्ध दिग्दर्शक रोहित शेट्टीच्या घरावर झालेल्या गोळीबार प्रकरणात पोलिसांना मोठे यश मिळाले आहे. पुण्यातून पाच आरोपींना ताब्यात घेण्यात आलं आहे.
Rohit Shetty : बॉलिवूडमधील प्रसिद्ध दिग्दर्शक रोहित शेट्टीच्या घरावर झालेल्या गोळीबार प्रकरणात पोलिसांना मोठे यश मिळाले आहे. या प्रकरणाशी संबंधित चार आरोपींना पुणे पोलिसांनी ताब्यात घेतले असून, पुढील तपासासाठी त्यांना मुंबई गुन्हे शाखेच्या स्वाधीन करण्यात आले आहे. पुणे आणि मुंबई पोलिसांच्या संयुक्त कारवाईमुळे या गंभीर प्रकरणाला नवे वळण मिळाले आहे.
पुण्यातील वारजे आणि कर्वेनगर परिसरातून या पाच संशयितांना ताब्यात घेण्यात आले. पोलिसांनी दिलेल्या प्राथमिक माहितीनुसार, हे चौघेही देशातील कुख्यात गँगशी संबंधित असल्याचे समोर आले आहे. त्यामुळे या गोळीबारामागे संघटित गुन्हेगारीचा हात असल्याची शक्यता अधिक बळावली आहे.
रोहित शेट्टी यांच्या मुंबईतील निवासस्थानी नुकताच अज्ञात व्यक्तींनी गोळीबार केला होता. सुदैवाने या घटनेत कोणतीही जीवितहानी झाली नाही. मात्र, या प्रकारामुळे बॉलिवूडसह संपूर्ण देशात खळबळ उडाली. या घटनेनंतर मुंबई पोलिसांनी तातडीने तपास सुरू केला आणि विविध सीसीटीव्ही फुटेज, तांत्रिक माहिती तसेच गुप्त बातमीदारांच्या आधारे तपासाची चक्रे फिरवली.
तपासादरम्यान मिळालेल्या ठोस माहितीच्या आधारे पुणे पोलिसांनी ही कारवाई करत चार आरोपींना अटक केली. चौकशीत या आरोपींचा गोळीबाराच्या घटनेत थेट सहभाग असल्याचा संशय व्यक्त केला जात आहे. तसेच हे आरोपी मुंबईतील गुन्हेगारी नेटवर्कशी जोडलेले असल्याची माहितीही समोर येत आहे.
पुणे पोलिसांनी प्राथमिक चौकशी केल्यानंतर पुढील तपासासाठी आणि गुन्ह्याच्या मुळाशी जाण्यासाठी या चारही आरोपींना मुंबई पोलिसांच्या ताब्यात देण्यात आले आहे. मुंबई गुन्हे शाखेकडून आता या आरोपींची सखोल चौकशी करण्यात येणार असून, या मागे कोणाचा आदेश होता, आर्थिक व्यवहार झाले का, तसेच आणखी कोणी सहभागी आहे का, याचा शोध घेतला जाणार आहे.
दरम्यान, या घटनेनंतर रोहित शेट्टी यांच्या सुरक्षेत वाढ करण्यात आली असून त्यांच्या निवासस्थानी पोलीस बंदोबस्त कडक करण्यात आला आहे. पुणे आणि मुंबई पोलिसांच्या या संयुक्त कारवाईमुळे गुन्हेगारी टोळ्यांना मोठा धक्का बसल्याचे मानले जात आहे.
एकूणच, रोहित शेट्टी यांच्या घरावर झालेल्या गोळीबार प्रकरणात आरोपींच्या अटकेमुळे तपासाला गती मिळाली असून, येत्या काळात या प्रकरणातील आणखी धक्कादायक माहिती समोर येण्याची शक्यता वर्तवली जात आहे.
