Kamlesh Sawant : वडील खिळ्यांवर झोपायचे, त्यांच्या छातीवर…कमलेश सावंत यांनी सांगितला संघर्षकाळ

अभिनेता होण्याचं स्वप्न पूर्ण करण्यासाठी अनेक कलाकारांना मोठा संघर्ष करावा लागतो. मनोरंजनविश्वात स्वतःची ओळख निर्माण करण्यापूर्वी त्यांना आर्थिक अडचणी, प्रतिकूल परिस्थिती आणि अनेक संकटांचा सामना करावा लागतो. मराठी आणि हिंदी चित्रपटसृष्टीत आपल्या अभिनयाची छाप पाडणारे अभिनेते कमलेश सावंत यांचाही प्रवास असाच संघर्षमय राहिला आहे. ‘दृश्यम’ चित्रपटातील गायतोंडे या भूमिकेमुळे ते विशेष लोकप्रिय झाले. कमलेश सावंत यांनी नुकत्याच दिलेल्या एका मुलाखतीत आपल्या बालपणीच्या आठवणींना उजाळा दिला. त्यांच्या वडिलांचा त्यांच्या व्यक्तिमत्त्वावर मोठा प्रभाव होता. कमलेश यांचे वडील रेल्वेमध्ये नोकरीला होते. त्यांना बॉडीबिल्डिंगची आवड होती.

कमलेश सावंत यांचा संघर्षकाळ

कमलेश सावंत म्हणाले की, ‘माझे वडील रेल्वेत कामाला होते. ते स्पोर्ट्स सेक्रेटरी होते. ते बॉडीबिल्डर होते. ते ड्रील एक्सरसाइजमध्ये भाग घ्यायचे. ते खिळ्यांवर झोपायचे आणि त्यांच्या छातीवर विटा ठेवल्या जायच्या, त्या विटा कोणीतरी हातोड्यानं मारून फोडायचा. ते सुयांवर उभे राहायचे आणि दुसरा माणूस त्यांच्या हातावर उभा राहायचा. ते या गोष्टी करायचे. आम्हाला कधीच ब्रेड-बटर खायला मिळाले नाही. आम्हाला नेहमी मोड आलेली कडधान्ये आणि चपाती मिळायची. चवीसाठी थोडं दूध, अंडी व थोडी साखर मिळायची. त्यामुळेच मी असा आहे.’

आर्थिक अडचणींबद्दल बोलताना कमलेश म्हणाले की, ‘माझी आई फक्त एकच साडी नेसायची. मी एका मध्यमवर्गीय कुटुंबातून आलोय, माझे नातेवाईकही आमच्यासोबत राहायचे. माझ्या वडिलांचा पगार सर्वांसाठी आणि आमच्या शिक्षणासाठी पुरेसा नव्हता. तीन बहिणी, एक मोठा भाऊ आणि मी अशी आम्ही पाच भावंडं होतो. प्रत्येकाला सगळं समान मिळालं पाहिजे, असा प्रयत्न वडील करायचे. लहानपणी मला खूप भूक लागली की, मी एक केळ आणायचो, ते चपातीत गुंडाळून खायचो. कधीकधी मी चपातीमध्ये पारले-जी बिस्किटं भरून खायचो. अशा प्रकारे आम्ही तडजोड करायला शिकत मोठे झालो.’

‘माझे वडील वारल्यानंतर मी आणि माझी आई खालच्या मजल्यावरील चाळीत राहायचो, तर माझा भाऊ पहिल्या मजल्यावर राहायचा. तिथे फारसा खर्च नसायचा. आम्ही 10,000 ते 15,000 रुपयांत आमचा महिन्याचा खर्च भागवायचो, कारण आम्ही रेशन दुकानातून 2 रुपये किलोनं तांदूळ आणून खायचो. आईला वडिलांची पेन्शन मिळायची आणि माझी भावंडं दर महिन्याला खर्चासाठी आईला पैसे द्यायची.’ असं कमलेश यांनी शेवटी म्हटलं.’स्क्रीन‘ला दिलेल्या मुलाखतीत कमलेश सावंत बोलत होते.