कपूर कुटुंबातील सर्वात ‘कंजूस’ अभिनेता कोण? करिश्मा कपूर कडून पोलखोल…

कपूर कुटुंबाबद्दल सांगायचं झालं तर, गेल्या अनेक वर्षांपासून कपूर कुटुंब बॉलिवूडवर राज्य करत आहे. अनेक दिग्गज सेलिब्रिटी देखील कपूर कुटुंबियांनी बॉलिवूडला दिले आहे. सांगायचं झालं तर, कपूर कुटुंबातील काही सेलिब्रिटी असे देखील आहे, जे कायम कोणत्या न कोणत्या कारणामुळे चर्चेत असतात. आता देखील कपूर कुटुंबातील अशी व्यक्ती चर्चेत आली आहे, जी प्रचंड कंजूस आहे. त्या व्यक्तीबद्दल अभिनेत्री करिश्मा कपूर हिने मोठा खुलासा केला आहे. सध्या सर्वत्र फक्त आणि फक्त कपूर कुटुंबातील सर्वात कंजूस व्यक्तीची चर्चा रंगली आहे.

सांगायचं झालं तर, अभिनेत्री करिश्मा कपूर नुकताच विनोदवीर कपिल शर्मा याच्या शोमध्ये वडील रणधीर कपूर यांच्यासोबत आली होती, तेव्हा कपिलने ‘कपूर कुटुंबातील सर्वात कंजूस व्यक्ती कोण आहे?’ असा प्रश्न विचारला. यावर करिश्मा तिच्या वडिलांकडे बोट करत म्हणाली, ‘पैसे खर्च करण्याच्या बाबतीत ते अत्यंत सावध असतात. ते खर्च खूप विचार करुन करतात, गरज नसताना कोणत्या वस्तूवर पैसे खर्च करायला त्यांना आवडत नाही.’

करिश्मा कपूर हिचं असं वक्तव्य ऐकून रणधीर कपूर म्हणाले, ‘माझे विचार ‘व्हॅल्यू फॉर मनी’ पर्यंत मर्यादित आहेत. मला असं वाटतं की, आपण पैसे तेव्हाच खर्च केले पाहिजे, जेव्हा आपल्याला गरज असेल…’, पुढे रणधीर कपूर यांच्याबद्दल एक मजेदार किस्सा करिश्मा हिने सांगितला.

करिश्मा म्हणाली, ‘आम्ही सगळे सुट्ट्यांचा आनंद घेण्यासाठी लंडनमध्ये जायचो… जायचं म्हणून सगळे शॉपिंगमध्ये व्यस्त असायचे. नवीन कपडे, बूट आणि दुसऱ्या वस्तू खरेदी करण्यामध्ये आम्ही व्यस्त असायचो… पण माझ्या वडिलांचा अंदाज फार वेगळा होता…’

‘मी जेव्हा त्यांना विचारायची काय नवीन घेतलं आहे. तेव्हा ते म्हणायचे, मी दोन जोडी मोजे खरेदी केले आहेत. अशात मी अनेकदा त्यांना शॉपिंगसाठी पुन्हा पाठवायचे. पण ते काहीच घेऊन यायचे नाहीत. ते फक्त दोन जोडी मोजे आणि दोन जोडी रुमालांची खरेदी करायचे…’ असं देखील करिश्मा म्हणालेली. यावर स्पष्टीकरण देत रणधीर कपूर म्हणाले, ‘एका पुरुषाला आणखी लागतं तरी काय? काही जोड मोजे, काही रुमाल, टाय, दोन – चार शर्ट आणि एक – दोन पँट…’, असं रणधीर कपूर म्हणालेले.