Kumar Sanu: समोरच बसलेला दाऊद, मी खूप घाबरलेलो..; कुमार सानू यांचा मोठा खुलासा

Kumar Sanu: गायक कुमार सानू यांची नव्वदच्या दशकात खूप क्रेझ होती. बॉलिवूड इंडस्ट्रीत सर्वाधिक मानधन घेणाऱ्या गायकांपैकी ते एक होते. त्यांनी देशात आणि परदेशात असंख्य शोज केले आणि आजही त्यांचा मोठा चाहतावर्ग आहे. नुकत्याच दिलेल्या एका मुलाखतीत त्यांनी त्यांच्या करिअरमधील सर्वांत मोठा किस्सा सांगितला. अंडरवर्ल्डमधील दाऊद इब्राहिम आणि अबू सालेम यांच्या पार्टीत परफॉर्म करण्यासाठी ते दुबईला गेले होते. अर्थात सुरुवातीला त्यांना हे माहीतच नव्हतं की ते दाऊदच्या पार्टीत गाणं गात होते. जेव्हा त्या पार्टीतील फोटो वृत्तपत्रांमध्ये छापले गेले, तेव्हा त्यांना परिस्थितीचं गांभीर्य लक्षात आलं होतं.

दुबईत दाऊदसमोर केलं परफॉर्म

‘द लल्लनटॉप’ला दिलेल्या मुलाखतीत कुमार सानू म्हणाले, “संगीत दिग्दर्शक नदीम यांनी त्यांना दुबईला नेलं होतं. तिथे कोणत्या तरी मोठ्या व्यक्तीच्या वाढदिवसाच्या पार्टीत परफॉर्म करायला जायचंय असं मला वाटलं होतं. तो कार्यक्रम कोणासाठी आहे, तिथे कोण उपस्थित राहणार आहेत, हे मला सांगण्यात आलं नव्हतं. पण प्रत्यक्षात त्यादिवशी दाऊदच्या भावाच्या मुलीचा का त्याच्या मुलीचा तरी वाढदिवस होता. मी आणि गायक अनु मलिक तिथे होतो. दाऊद इब्राहिमसुद्धा तिथे होता. मी त्याला माझ्यासमोर बसलेलं पाहिलं. मी स्टेजवर नेहमी परफॉर्म करणारी गाणी गायली होती. त्यावेळी दाऊद त्याच्या कुटुंबासह समोर बसला होता.”

वर्तमानपत्रात फोटो पाहून बसला धक्का

“काही गाण्यांची फर्माइश मला करण्यात आली होती. मी स्टेजवर सहसा जी गाणी गातो, त्या सर्व गाण्यांची त्यांनी मागणी केली. दाऊद त्याच्या कुटुंबासोबत माझ्यासमोरच बसला होता. त्यानंतर मी त्याला पुन्हा कधीच भेटलो नाही किंवा त्याच्याशी बोललो नाही. आम्हाला त्याबद्दल आधी माहिती नव्हती. एक संगीत दिग्दर्शक मला घेऊन जात होता, त्यामुळे माझा त्याच्याशी काहीही संबंध नव्हता. ते फक्त म्हणाले, चल तुला दुबईमध्ये एका वाढदिवसाच्या पार्टीत गाण्याची ऑफर आली आहे. नंतर जेव्हा माझा फोटो वर्तमानपत्रात छापून आला, तेव्हा मला वाटलं, मी हे काय केलं? मला तेव्हा खूप भीती वाटली”, अशी कबुली कुमार सानू यांनी दिली.

अबू सालेमच्या शोमध्येही केलं परफॉर्म

याच मुलाखतीत कुमार सानू यांनी अबू सालेमशी संबंधित एका कार्यक्रमातील घटनेबद्दलही खुलासा केला. “एकाने मला फोन करून धमकी दिली होती की, आम्हाला एवढे पैसे द्या. मी म्हणालो, माफ करा, मी पैसे देऊ शकणार नाही. काही काम असेल तर सांगा. तुम्हाला माझ्याकडून गाणं गाऊन घ्यायचं असेल तर सांगा. मी एकदा अबू सालेमच्या शोमध्ये परफॉर्म करण्यासाठी दुबईलाही गेलो होतो. यात घाबरण्यासारखं किंवा लपवण्यासारखं काहीच नाही. जेव्हा पोलिसांना याबद्दल समजलं तेव्हा त्यांनी मला निघण्यापूर्वीच इशारा दिला होता की, त्या कार्यक्रमाला उपस्थित राहू नकोस”, असं त्यांनी पुढे सांगितलं.

पोलिसांनी दिलेला आधीच इशारा

“मला पोलीस स्टेशनमधून फोन आला आणि ते म्हणाले की, तुम्ही अबू सालेमच्या शोमध्ये परफॉर्म करणार आहात का? मी म्हणालो, हो मी जाणार आहे. मी काय करू? पोलीस अधिकारी म्हणाले, तुम्ही जाऊ नका. मी म्हणालो, मी जाणार नाही, पण तुम्ही मला सुरक्षा द्या. जर त्याने माझ्यावर गोळी झाडली, तर सांगा मी काय करू? तुम्ही मला सुरक्षा द्या. त्यानंतरही त्यांनी मला अटकेचा इशारा दिला होता. जर तू गेलास तर आम्ही तुम्हाला तिथे अटक करू. मी म्हणालो, हे बघा एकतर तुम्ही मला सुरक्षा द्या किंवा मला काहीही होणार नाही, याची खात्री करा. मी एक गायक आहे. मला गायलाच पाहिजे. ती माझी गरज आहे. मी तिथे गेलो, परफॉर्म केलं आणि परत आलो. कोणी काहीही म्हणालं नाही. कार्यक्रमानंतर मी हॉटेलवर जाऊन माझं सामान घेतलं आणि परत आलो. ज्या गोष्टीसाठी मला धमकी देण्यात आली होती, तेच मी केलं. मी सुखरुप परत आलो”, असा प्रसंग कुमार सानू यांनी सांगितला.