Kunickaa Sadanand: कुनिका सदानंदच्या अत्यंत जवळच्या व्यक्तीने गमावले प्राण; डोळे पाणावणारी पोस्ट

बॉलिवूड आणि टेलिव्हिजन अभिनेत्री कुनिका सदानंदवर दु:खाचा डोंगर कोसळला आहे. कुनिकाची आई कल्याणी सदानंद यांचं गोव्यात वयाच्या 83व्या वर्षी निधन झालं. मंगळवारी कुनिकाने सोशल मीडियावर आईचा जुना फोटो शेअर करत ही दुःखद बातमी चाहत्यांसोबत शेअर केली. आईच्या आठवणींना उजाळा देताना तिने लिहिलेली भावूक पोस्ट सध्या चर्चेत आहे. कुनिकाने आईला केवळ जन्मदाती म्हणून नव्हे, तर आयुष्यभर मार्गदर्शन करणारी आणि आत्मविश्वास देणारी व्यक्ती म्हणून आठवलं. तिच्या पोस्टमध्ये आईबद्दलचं प्रेम आणि कृतज्ञता प्रकर्षाने जाणवते. आयुष्यात स्वप्न पाहण्याचं धाडस, जगातील आव्हानांना सामोरं जाण्याची ताकद आणि स्वतःवर विश्वास ठेवण्याची शिकवण आईकडून मिळाल्याचं तिने सांगितलं.

कल्याणी सदानंद यांना कुनिकाने प्रेमाने ‘एम्प्रेस’ म्हणून संबोधलं. त्यांच्या स्वभावाचं वर्णन करताना त्या आनंदी, मनमोकळ्या आणि विनोदी स्वभावाच्या होत्या, अशी आठवण तिने सांगितली. कुटुंबीय आणि मित्रमंडळी त्यांना नेहमी हसतमुख आणि प्रेमळ व्यक्तिमत्त्व म्हणून लक्षात ठेवतील, असंही कुनिकाने तिच्या पोस्टमध्ये नमूद केलं. आईच्या निधनानंतर लिहिलेल्या संदेशात कुनिकाने तिच्या आत्म्याला शांती लाभावी, अशी प्रार्थना केली. आईने पत्नी, आई, बहीण, आजी अशा विविध नात्यांमध्ये आपली जबाबदारी प्रेमाने पार पाडली, असं तिने म्हटलं. आता ती आपल्या दिवंगत भावंडांना आणि जवळच्या व्यक्तींना पुन्हा भेटली असेल, अशी भावनाही कुनिकाने व्यक्त केली.

कुनिकाची पोस्ट-

View this post on Instagram

A post shared by Kunickaa Sadanand (@iam_kunickaasadanand)

गोव्यात होणार अंत्यसंस्कार

कल्याणी सदानंद यांच्यावर गोव्यात अंत्यसंस्कार करण्यात येणार आहेत. त्यानंतर कुटुंबीयांकडून इतर धार्मिक विधी मुंबईत केले जाणार असल्याची माहिती समोर आली आहे. आईच्या निधनाची बातमी समोर आल्यानंतर कुनिकाच्या चाहत्यांसह मनोरंजन क्षेत्रातील अनेक व्यक्तींनी सोशल मीडियावर शोक व्यक्त केला आहे.

धर्मेंद्र यांच्या मोठ्या चाहत्या होत्या कल्याणी

कल्याणी सदानंद यांचा बॉलिवूडशी आणखी एक खास संबंध होता. त्या ज्येष्ठ अभिनेते धर्मेंद्र यांच्या मोठ्या चाहत्या होत्या. कुनिकाने एका जुन्या आठवणीत सांगितलं होतं की, धर्मेंद्र यांच्यासोबत शूटिंग सुरू असताना त्या आईलाही सेटवर घेऊन गेल्या होत्या. आपल्या आवडत्या अभिनेत्याला जवळून पाहण्याची आणि त्यांच्याशी बोलण्याची संधी मिळाल्याने कल्याणी खूप आनंदी झाल्या होत्या. धर्मेंद्र यांनीही त्यांच्याशी मनमोकळ्या गप्पा मारल्या होत्या.

कुनिका सदानंदने हिंदी चित्रपट आणि टीव्ही मालिकांमध्ये दीर्घकाळ काम केलं आहे. ‘खिलाडी’, ‘बेटा’, ‘मोहरा’, ‘कोयला’, ‘हम साथ-साथ हैं’ आणि ‘पेज 3’ यांसारख्या चित्रपटांमध्ये तिने भूमिका साकारल्या आहेत. ‘बिग बॉस’मधील सहभागामुळेही ती पुन्हा चर्चेत आली होती.