Malaika Arora: अरबाजच्या कुटुंबीयांविषयी मलायका झाली व्यक्त; “त्यांच्यासाठी मी कधीच…”

मुंबई: अभिनेत्री मलायका अरोराचा ‘मूव्हींग इन विथ मलायका’ हा शो चांगलाच चर्चेत आहे. नुकत्याच पार पडलेल्या एका एपिसोडमध्ये निर्माता-दिग्दर्शक करण जोहरने हजेरी लावली होती. यावेळी करणशी बोलताना मलायका ही अरबाज खानच्या कुटुंबातील तिच्या स्थानाविषयी व्यक्त झाली. मलायका आणि अरबाजने 2017 मध्ये घटस्फोट घेतला. त्यानंतर तिचं त्याच्या कुटुंबीयांशी नातं कसं आहे, याविषयी ती मनमोकळेपणाने व्यक्त झाली.

या एपिसोडमध्ये मलायकाने तिच्या अपघाताच्या कटू आठवणी सांगितल्या. इतकंच नव्हे तर शुद्धीवर आल्यानंतर तिच्या डोळ्यांसमोर असलेली पहिली व्यक्ती अरबाज खान होता, असंही तिने सांगितलं. त्यावर करण जोहरनेही अरबाजच्या कुटुंबीयांचा उल्लेख केला. “मला आठवतंय की तुझ्या अपघातानंतर संपूर्ण कुटुंब तुला भेटायला आलं होतं. ते तुझ्यासोबत तिथे होते. काही नाती ही कायम सोबत असतात”, असं करण म्हणाला.

मलायका म्हणाली, “त्यांच्या यादीत मी कधीच पहिल्या क्रमांकावर मी नसेन, पण अरहान आहे, म्हणून ते माझी काळजी करतात आणि हीच योग्य गोष्ट आहे.”

2 एप्रिल 2022 रोजी मलायकाचा खोपोलीत अपघात झाला होता. ती शूटिंगनंतर पुण्याहून मुंबईला येत होती तेव्हा हा अपघात झाला होता. या अपघातात मलायकाच्या डोक्याला मार लागला होता.

अपघाताच्या कटू आठवणी

“काही तास मला समोरचं काहीच दिसत नव्हतं. मला खरंच वाटलं की माझा जीव गेलाय आणि मी आता माझ्या मुलाला कधीच भेटू शकणार नाही. मला रुग्णालयात दाखल करण्यात आलं होतं. उपचारानंतर जेव्हा मी पहिल्यांदा मी डोळे उघडले तेव्हा मला अरबाज दिसला. मला नीट दिसतंय का, हे तो मला विचारत होता. मी शुद्धीवर आहे का हे तपासून पाहण्यासाठी तो हात दाखवून ही किती बोटं आहेत असं विचारत होता. काही सेकंदांसाठी मला वाटलं होतं की मी पुन्हा भूतकाळात गेले,” असा अनुभव मलायकाने सांगितला होता.