भव्यता, डायलॉग आणि नृत्याविष्कार…; प्राजक्ता माळीच्या ‘फुलवंती’ सिनेमाचा टीझर रिलीज
Prajkta Mali Phulwanti Movie Teaser : अभिनेत्री प्राजक्ता माळी हिचा नवा सिनेमा लवकरच प्रेक्षकांच्या भेटीला येत आहे. या सिनेमाचा टीझर प्रेक्षकांच्या भेटीला आला आहे. प्राजक्ताच्या या सिनेमासाठी तिचे चाहते उत्सुक आहेत. प्राजक्ताच्या अभिनयाचं तिच्या चाहत्यांकडून तोंडभरून कौतुक होत आहे. वाचा...
अभिनेत्री प्राजक्ता माळी सातत्याने वेगळ्या धाटणीच्या भूमिका साकारत असते. आतीही तिने नव्या सिनेमाची घोषणा केली आहे. ‘फुलवंती’ सिनेमाचा टीझर रिलीज झाला आहे. पद्मविभूषण बाबासाहेब पुरंदरे यांच्या लेखणीतून साकारलेली ‘फुलवंती’ लवकरच प्रेक्षकांच्या भेटीला येणार आहे. या सिनेमाच्या टिझरने प्रेक्षकांची मनं जिंकली आहेत. ‘फुलवंती’ ही अलौकिक कलाकृती चित्रपटरुपात आपल्यासमोर 11 ऑक्टोबरला अवतरणार आहे. त्याआधी चित्रपटाचा देखणा टीझर प्रेक्षकांच्या भेटीला आला आहे. या टिझरमधील भव्यता, डायलॉग आणि नृत्याने प्रेक्षकांना भूरळ पाडली आहे. नेटकऱ्यांनी कमेंट करत प्राजक्ताच्या या नव्या सिनेमाच्या टिझरचं कौतुक केलंय.
डायलॉगने वेधलं लक्ष
चित्रपटाचे अप्रतिम सेट्स, उच्च तांत्रिकमूल्ये, दमदार ऐतिहासिक व्यक्तिरेखा त्याला तेवढ्याच धारदार संवादाची सोबत अशा भव्यतेने येणारा ‘फुलवंती’ हा देखणा चित्रपट रसिकांसाठी मनोरंजनाची अपूर्व पर्वणी ठरणार आहे. या सिनेमाच्या टिझरमधील एक डायलॉग प्रेक्षकांना भावला आहे. ‘नाचात काहींना शौक दिसतो. तर काहींना कला… प्रश्न नजरेचा आहे… ती साफ असेल तर ‘फुलवंती’ पण तुम्हाला दुर्गाच दिसेल…’ हा प्राजक्ता माळीच्या तोंडी असणारा डायलॉग प्रेक्षकांना आवडला आहे. माझी खात्री आहे जसा पावनखिंड गाजला पिक्चर तसाच हा फुलवंती सिनेमा पण खूप गाजणार आहे. त्यात शंकाच नाही.. बघा तुम्हीच…, अशी कमेंट प्राजक्ता माळी हिच्या चाहत्याने केली आहे.
‘फुलवंती’ कधी रिलीज होणार?
पेशवाई काळातील ‘फुलवंती’ नावाची सुप्रसिद्ध नर्तिका आणि प्रकांडपंडीत व्यंकटशास्त्री यांची दमदार कथा असलेली आणि देखण्या कलाविष्काराने सजलेली फुलवंती मराठी सिनेसृष्टीतील भव्यदिव्य, अविस्मरणीय कलाकृती ठरेल. पॅनोरमा स्टुडिओज सादर करत आहेत… ‘फुलवंती’ मंगेश पवार अँड कंपनी आणि शिवोहम् क्रिएशन्स प्रायव्हेट लिमिटेड निर्मित ही भव्य कलाकृती 11 ऑक्टोबरला रसिकांच्या भेटीला येत आहे. या चित्रपटाचे संवाद लेखन प्रविण विठ्ठल तरडे यांनी केलं आहे. तर दिग्दर्शन स्नेहल प्रविण तरडे यांनी केलं आहे.
छत्रपतींनंतर मराठा साम्राज्याची धुरा पेशव्यांनी अतिशय समर्थपणे सांभाळली. त्यांच्या दरबारात एकापेक्षा एक धुरंदर होते. त्यातील एक म्हणजे सकल शास्त्रपारंगत व्यंकटध्वरी नरसिंह शास्त्री. श्रीमंतांच्या दरबारातील साक्षात बृहस्पती… अभिनेता गश्मीर महाजनी याने व्यंकटध्वरी नरसिंह शास्त्री यांची भूमिका साकारली आहे.व्यकंट शास्त्री यांचे व्यक्तिमत्व, त्यांची बुद्धिमत्ता आणि चारही दिशांना पसरलेली त्यांची किर्ती हे सर्व आपल्याला या ऐतिहासिकपटातून पाहायला मिळणार आहे.
