Dharmaveer : आनंद दिघेंच्या मृत्यूचा प्रसंग पाहणं उद्धव ठाकरेंनी टाळलं! सिनेमा अर्धवट सोडून थिएटरबाहेर
Dharmaveer Marathi Movie : आनंद दिघे यांच्या मृत्यूचा प्रसंग पाहणं मुख्यमंत्री आणि शिवसेना पक्षप्रमुख उद्धव ठाकरे यांनी टाळलंय.
मुंबई : शिवसेनेचे ज्येष्ठ नेते आणि ठाण्यातील एक आघाडीचं नाव असलेले आनंद दिघे (Aanand Dighe) यांच्या जीवनावर आधारीत असलेला धर्मवीर चित्रपट (Dharmaveer Marathi Movie) रिलीज झाला. त्यानंतर आता चित्रपटाबाबत एक रंजक किस्सा मुंबईत पाहायला मिळाला. हा चित्रपट पाहायला गेलेले मुख्यमंत्री उद्धव ठाकरे (Uddhav Thackeray) चित्रपटाचा शेवट न पाहताच चित्रपटगृहातून बाहेर पडले. उद्धव ठाकरे यांनी धर्मवीर चित्रपटाचा शेवटचा सीन न पाहता बाहेर थिएटरबाहेर आलेल्या उद्धव ठाकरेंना पाहून सगळे अवाक् झाले. त्यांनी नेमकं असं का केलं, याबाबतही त्यांना प्रश्न विचारण्यात आला. आनंद दिघे यांच्या मृत्यूचा प्रसंग पाहणं मुख्यमंत्री आणि शिवसेना पक्षप्रमुख उद्धव ठाकरे यांनी टाळलंय. चित्रपटगृहातून बाहेर पडल्यानंतर उद्धव ठाकरे यांनी माध्यमांना प्रतिक्रिया देताना म्हटले की, मी चित्रपटाचा शेवट पाहू शकलो नाही कारण आनंद दिघे यांच्या अपघातानंतर मी व्यतिथ झालेले बाळासाहेब पहिले आहेत. आनंद दिघे यांचा मृत्यू शिवसैनिकांवर एक आघात होता, असंही ते म्हणालेत.
धर्मवीर मुक्काम पोष्ट ठाणे या चित्रपटातील आनंद दिघे यांचा अपघात आणि त्यानंतर रुग्णालयात उपचारादरम्यान झालेल्या मृत्यूचा प्रसंग पाहाणं मुख्यमंत्री-शिवसेना पक्षप्रमुख उद्धव ठाकरे यांनी टाळले. उद्धव ठाकरे यांनी चित्रपटाचा शेवट न पाहाताच चित्रपटगृह सोडले.
काय आहे तो प्रसंग?
आनंद दिघे यांच्या जीपला झालेला अपघात, त्यानंतर जखमी दिघे यांची सिंघानिया रुग्णालयात विचारपूस करण्यासाठी आलेले तत्कालीन शिवसेना नेते राज ठाकरे आणि तत्कालीन मुख्यमंत्री नारायण राणे तसंच आनंद दिघे यांच्या मृत्यूनंतर सिंघनिया रुग्णालयात एकत्र धाव घेतलेले राज ठाकरे आणि उद्धव ठाकरे असे काही प्रसंग चित्रपटाच्या शेवटच्या 10 मिनिटांत आहेत. सिनेमाच्या शेवटी असलेले अवघ्या 10 मिनिटांचा प्रसंग अंगावर काटा आणणार आहे.
आणि उद्धव ठाकरे बाहेर आले..
मिलिंद नार्वेकर यांच्या घरगुती गणपतीचे दर्शन घेऊन आनंद दिघे ठाण्यात परततात. चित्रपटातील हा प्रसंग संपतातच उद्धव ठाकरे चित्रपटगृहातून निघाले. नरिमन पॉईंट येथील आयनॉक्स मल्टिपेक्स चित्रपटगृहात उद्धव ठाकरे आणि कुटुंबीय तसंच शिवसेना आमदार- नेत्यांसाठी विशेष स्क्रिनिंगचं आयोजन करण्यात आले होते.
या स्क्रिनिंगला उद्धव ठाकरे यांच्यासह यांच्या पत्नी रश्मी ठाकरे तसंच शिवसेनेचे मंत्री-नेते एकनाथ शिंदे, पक्षाची काही वरिष्ठ नेते, काही आमदार-खासदारही उपस्थित होते. यावेळी चित्रपटातील कलावंत, दिग्दर्शक, निर्माते, तंत्रज्ञ अशी टीमही उपस्थित होती.
मोठ्या पडद्यावर साकारण्यात आलेल्या आनंद दिघे यांच्या राजकीय जीवनपटाला उपस्थितांनी दाद दिली. मात्र, उद्धव ठाकरे यांनी चित्रपटातील तो शेवटचा प्रसंग पाहाणे टाळले. रश्मी ठाकरे आणि उपस्थित नेते-आमदारांनी मात्र संपूर्ण चित्रपट पाहिला.
