मराठी प्रेक्षकांनो, खुशखबर! दादा कोंडके यांच्या स्टुडिओमध्ये पुन्हा कॅमरा रोल, महाराष्ट्राला नवं काहीतरी बघायला मिळणार?

पुणे : महाराष्ट्रातील प्रेक्षक वर्गाने दादा कोंडके (Dada Kondke) सारखा आवलिया नट पाहिला. दादा कोंडके यांचे प्रत्येक चित्रपट गाजले. त्यांचा अभिनय, त्यांची गाणी, त्यांचा विनोद आणि त्यांचा विनोदाची टायमिंग सगळंच भारी होतं. ते ज्या चित्रपटांची निर्मिती करायचे त्या चित्रपटात ते स्वत: मुख्य भूमिकेत दिसायचे. ते स्वत: गाणीही लिहायचे, ते स्वत: गायक सुद्धा व्हायचे. त्यांचा प्रत्येक चित्रपट सुपरहिट ठरायचा. त्यामुळे महाराष्ट्रातील लाखो प्रेक्षक त्यांच्यावर आजही तितकंच प्रेम करतात. या सर्व प्रेक्षकांसाठी आनंदाची बातमी आहे. कारण दादा कोंडके यांच्या स्टुडियेतील कॅमेरा आता पुन्हा रोल होणार आहे.

आनंदाची बातमी अशी की, 30 वर्षानंतर दादा कोंडकेंच्या स्टुडिओमध्ये कॅमरा रोल, साऊंड, ॲक्शनचा आवाज घुमलाय. पुण्यातल्या भोर तालुक्यातील इंगवली या दादा कोंडकेंच्या मुळ गावी असणारा दादांचा कोंडकेंचा स्टुडिओ, त्यांच्या जाण्यानंतर गेल्या कित्येक वर्षांपासून शूटिंगच्या प्रतीक्षेत होता. आता याच स्टुडिओतून दादा कोंडके यांचे पुतणे विजय कोंडके यांनी ‘लेक असावी तर अशी’ या नव्या चित्रपटाची घोषणा केलीय.

विजय कोंडके यांनी माजी मंत्री अनंतराव थोपटे यांच्या हस्ते उदघाट्न करत शूटिंगला सुरुवात केलीय. ‘माहेरची साडी’ या चित्रपटच्या यशानंतर, विजय कोंडके तब्बल 30 वर्षांनी पुन्हा चित्रपटाच्या मार्फत चित्रपटसृष्टीत पुनरागमन करणार आहेत. ज्याप्रमाणे या मातीत शूट केलेले दादा कोंडके यांचे चित्रपट हिट ठरले, त्याचप्रमाणे या चित्रपटलाही प्रेक्षकांचं प्रेम मिळणार असल्याचा विश्वास विजय कोंडकेंसह चित्रपटातील कलाकारांनी व्यक्त केलाय.

चित्रपटातील प्रमुख कलाकारांची नावे :

1) विजय कोंडके, दिग्दर्शक 2) यतीन कारेकर, कलाकार 3) शुभांगी गोखले, कलाकार 4) गार्गी दातार, कलाकार 5) प्राजक्ता हणमघर कलाकार

विजय कोंडके यांनी 30 वर्षांपूर्वी माहेरची साडी चित्रपटाचं दिग्दर्शन केलं होतं. माहेरची साडी हा चित्रपट 1991 साली प्रदर्शित झाला होता. या चित्रपटाला प्रेक्षकांचा प्रचंड प्रतिसाद मिळाला होता. विशेष म्हणजे 1990 च्या काळात या चित्रपटाने तब्बल 12 कोटी रुपयांची कमाई केली होती. त्या काळात हा चित्रपट सर्वाधिक कमाई करणारा चित्रपट ठरला होता. विशेष म्हणजे हा चित्रपट त्या काळात दोन वर्षाहून अधिक काळ गाजला होता.

दादा कोंडके यांच्यासारखंच यश त्यांचे पुतणे विजय कोंडके यांना मिळतं का? ते पाहणं महत्त्वाचं ठरणार आहे. 1990 चा काळ वेगळा होता. आताच्या परिस्थितीत भरपूर बदल झाले आहेत. प्रत्येक गोष्टीत बदल झाले आहेत. त्यामुळे आताच्या काळानुसार, नव्या पिढीच्या विचारधारेशी जुळवून घेऊन विजय कोंडके चित्रपटाची कथा कशी रंगवतात ते पाहणं महत्त्वाचं ठरणार आहे.