छत्रपती संभाजी महाराज यांच्या जीवनावर सिनेमा; ‘हा’ अभिनेता साकारतोय मुख्य भूमिका

अवघ्या महाराष्ट्राचं प्रेरणास्थान छत्रपती संभाजी महाराज यांच्या जीवनावर सिनेमा येत आहे. ‘धर्मरक्षक महावीर छत्रपती संभाजी महाराज’असं या सिनेमाचं नाव आहे. हा चित्रपट हिंदी आणि मराठी दोन्ही भाषेत प्रदर्शित होणार आहे. या सिनेमात अभिनेता ठाकूर अनुप सिंग याने छत्रपती संभाजी महाराज यांची भूमिका साकारली आहे. या सिनेमातचं टायटल साँग प्रेक्षकांच्या भेटीला आलं आहे. ‘राजं संभाजी’ हे गाणं रिलीज झालं आहे. हे गाणं गायक नंदेश उमप यांनी गायलं आहे. मोहित कुलकर्णी यांचं संगीत आहे आणि गाण्याचे गीतकार हृषिकेश झांबरे आहेत. संदीप रघुनाथराव मोहिते-पाटील प्रस्तुत आणि उर्विता प्रॉडक्शन निर्मित ‘धर्मरक्षक महावीर छत्रपती संभाजी महाराज’ चित्रपट लवकरच प्रेक्षकांच्या भेटीला येणार आहे.

कोण- कोण कलाकार?

‘राजं संभाजी’ हे गाणं आपल्या राष्ट्रवीर आणि हिंदवी स्वराज्याचे संरक्षक छत्रपती संभाजी महाराज यांच्या जीवनावर आधारित आहे. त्यांच्या शौर्याचा आणि बलिदानाचा गौरव या सिनेमात पाहायला मिळतो. या गाण्यात उत्तम कलाकारांची तगडी फौज आहे ज्यामध्ये ठाकूर अनुप सिंग, अमृता खानविलकर, किशोरी शहाणे, भार्गवी चिरमुले, आणि मल्हार मोहिते-पाटील हे महत्वाच्या भूमिकेत आहेत.

सिनेमा कधी रिलीज होणार?

धर्म आणि स्वराज्यासाठी समर्पित असलेल्या छत्रपती संभाजी महाराजांच्या अद्वितीय कार्याची गाथा या चित्रपटात पाहायला मिळणार आहे. संदीप रघुनाथ मोहिते पाटील प्रस्तुत आणि उर्विता प्रोडक्शन निर्मित ‘धर्मरक्षक महावीर संभाजी महाराज’ चित्रपटाची निर्मिती शेखर मोहिते पाटील, सौजन्य निकम आणि केतन राजे भोसले यांनी केली आहे. येत्या 22 नोव्हेंबरला चित्रपट प्रदर्शित होणार आहे.

‘धर्मरक्षक महावीर छत्रपती संभाजी महाराज’ सिनेमाचे दिग्दर्शक तुषार शेलार यांनी या सिनेमाबाबतचं मत व्यक्त केलं आहे. टायटल साँगबद्दलही त्यांनी प्रतिक्रिया दिली आहे. ‘राजं संभाजी’ हे गाणं चित्रपटाच्या हृदयाशी जोडलेलं आहे. छत्रपती संभाजी महाराजांच्या धैर्यशील व्यक्तिमत्त्वाला आणि त्यांच्या अभूतपूर्व पराक्रमाला संगीताच्या रूपात साजरं करणं हे आमच्यासाठी खूप मोठं आव्हान होतं. या गाण्यातून त्यांची वीरता, निष्ठा आणि संघर्ष रसिकांपर्यंत पोहोचवण्याचा प्रयत्न आम्ही केला आहे. मला खात्री आहे राज संभाजी गाणं प्रेक्षकांच्या मनात खास स्थान निर्माण करेल, असं दिग्दर्शक तुषार शेलार म्हटलं आहे.