Mushtaq Khan: ‘वेलकम’ फेम मुश्ताक खान यांच्या निधनाने खचले कुटुंबीय, कोण आहे पत्नी? लाइमलाइटपासून दूर असतात मुलं
Mushtaq Khan: 'गदर', 'वेलकम' फेम अभिनेते मुश्ताक खान यांचं निधन झालं आहे. त्यांच्या पश्चात पत्नी आणि दोन मुलं असा परिवार आहे. मुश्ताक हे कॅन्सरशी झुंज देत होते. अखेर 24 सप्टेंबर रोजी त्यांची प्राणज्योत मालवली.
Mushtaq Khan: बॉलिवूडमधील लोकप्रिय अभिनेते मुश्ताक खान यांच्या निधनाने मनोरंजनसृष्टीवर शोककळा पसरली आहे. ‘वेलकम’, ‘गदर’, ‘आशिकी’, ‘मुझसे शादी करोगी’ आणि ‘हम हैं राही प्यार के’ यांसारख्या चित्रपटांमधून त्यांनी आपल्या अभिनयाची वेगळी छाप सोडली. 24 सप्टेंबर 2026 रोजी कॅन्सरवरील उपचारादरम्यान मुंबईतील नानावटी रुग्णालयात त्यांचं निधन झालं. मुश्ताक खान यांनी आपल्या वैयक्तिक आयुष्याला कायम प्रसिद्धीपासून दूर ठेवलं. त्यांचा विवाह सलमा खान यांच्यासोबत झाला होता. मुश्ताक यांनी एका मुलाखतीत आपल्या प्रेमप्रकरणाबद्दलही सांगितलं होतं. प्रेमभंगानंतर त्यांनी कुटुंबीयांच्या इच्छेनुसार अरेंज मॅरेज केलं होतं. अभिनय क्षेत्रात दीर्घकाळ काम करूनही मुश्ताक यांनी कुटुंबाला लाइमलाइटपासून दूर ठेवलं. आजारपणाच्या काळात पत्नी आणि मुलांनी त्यांना मोठा आधार दिला.
मुश्ताक खान यांना दोन मुलं आहेत. त्यांच्या मोठ्या मुलाचं नाव मोहम्मद अरशद खान आहे. तोसुद्धा प्रसिद्धीपासून दूर राहणं पसंत करतो. अरशदचे लग्न सबा खानशी झालं असून ती शिक्षिका आहे. कुटुंबातील बहुतांश सदस्य आपले वैयक्तिक आयुष्य सार्वजनिक चर्चेपासून दूर ठेवतात. मुश्ताक खान यांचा छोटा मुलगा मोहसिन खान मात्र वडिलांच्या पावलावर पाऊल ठेवत मनोरंजन क्षेत्राशी जोडला गेला. मात्र त्याने अभिनयाऐवजी दिग्दर्शन आणि निर्मितीची वाट निवडली. मोहसिनने ‘डिलिव्हरी बॉय’ या फीचर फिल्मचं दिग्दर्शन केलं आहे. याशिवाय म्युझिक व्हिडीओ आणि वेब प्रोजेक्ट्समध्येही त्यांनी काम केलं आहे. हिंदी आणि मराठी मनोरंजन क्षेत्रात दिग्दर्शक, निर्माता आणि स्टोरीटेलर म्हणून तो सक्रिय आहे.
View this post on Instagram
मुश्ताक खान यांनी आपल्या कारकिर्दीत 500 हून अधिक चित्रपटांमध्ये विविध भूमिका साकारल्या आहेत. कॉमेडी आणि सपोर्टिंग भूमिकांमुळे त्यांना विशेष लोकप्रियता मिळाली. ‘वेलकम’मधील बल्लूची भूमिका आजही प्रेक्षकांच्या लक्षात आहे. चित्रपटांसोबतच त्यांनी ‘भारत एक खोज’, ‘नुक्कड’, ‘अदालत’ आणि ‘कुछ रंग प्यार के ऐसे भी’ यांसारख्या टीव्ही मालिकांमध्येही काम केलं.
मुश्ताक खान यांना काही वर्षांपूर्वी कॅन्सरचं निदान झालं होतं. अलीकडे आजार पुन्हा बळावल्याने त्यांना नानावटी रुग्णालयात दाखल करण्यात आलं होतं. सुमारे दोन आठवडे उपचार घेतल्यानंतर त्यांची प्रकृती खालावली आणि 24 सप्टेंबर रोजी त्यांचं निधन झालं. त्यांच्या पश्चात पत्नी आणि मुलांचा परिवार आहे. मुश्ताक खान यांनी पडद्यावर साकारलेल्या असंख्य व्यक्तिरेखा त्यांच्या चाहत्यांच्या कायम स्मरणात राहतील. त्यांच्या निधनाने एका अनुभवी कलाकाराचा प्रवास संपला असला, तरी त्यांच्या चित्रपटांमधील भूमिका आणि मनोरंजन क्षेत्रातील योगदान कायम चर्चेत राहणार आहे.
