Neha Dhupia | लग्नाआधी गरोदर झाल्याने नेहा धुपिया तुफान ट्रोल; आता दिलं सडेतोड उत्तर
नेहा धुपियाने अभिनेता अंगद बेदीशी 10 मे 2018 रोजी लग्न केलं. या लग्नाला फक्त मोजके कुटुंबीयच उपस्थित होते. त्यानंतर नेहाने त्याच वर्षी नोव्हेंबर महिन्यात मुलीला जन्म दिला. नेहा लग्नाआधी प्रेग्नंट असल्याची गोष्ट अनेकांना पचनी पडली नाही आणि त्यांनी यासाठी तिला ट्रोलही केलं.
मुंबई | 10 ऑगस्ट 2023 : अभिनेत्री नेहा धुपिया तिच्या पहिल्या प्रेग्नंसीदरम्यान सोशल मीडियावर तुफान चर्चेत होती. लग्नाआधीच नेही गरोदर राहिल्याने तिच्यावर अनेकांनी टीकासुद्धा केली होती. इतकंच नव्हे तर यामुळे तिला आजही ट्रोल केलं जातं. त्यावर आता नेहाने मोकळेपणे उत्तर दिलं आहे. “आपण सर्वजण कॅन्सल कल्चरचे पीडित आहोत. बहुतांश वेळी आपण सोशल मीडियाचा गैरवापर करतो आणि त्यापैकी सर्वाधिक वेळ अशीच असते जेव्हा तुम्ही इतरांना कमी लेखण्याचा प्रयत्न करता. आम्ही सेलिब्रिटी किंवा पब्लिक फिगर आहोत म्हणून याचा अर्थ असा होत नाही की कोणीही आम्हाला काहीही बोलू शकेल”, असं नेहा म्हणाली.
गरोदरपणावरून झालेल्या ट्रोलिंगविषयी नेहा पुढे म्हणाली, “मला आजही अशा आर्टिकल्समध्ये टॅग केलं जातं, तेव्हा लग्नाआधी गरोदर झालेल्या महिलांचा विषय असतो. कारण कोणीतरी तुमच्या चक्राबद्दल विचित्र गणित करत बसला आहे, जे खरंच विनाकारण आहे. लोक कशा प्रकारचे कॅल्क्युलेशन करतात आणि तुमच्यावर नजर ठेवून असतात, हे समजत नाही. या सर्व गोष्टींना काहीच अर्थ नाही.”
View this post on Instagram
नेहा धुपियाने अभिनेता अंगद बेदीशी 10 मे 2018 रोजी लग्न केलं. या लग्नाला फक्त मोजके कुटुंबीयच उपस्थित होते. त्यानंतर नेहाने त्याच वर्षी नोव्हेंबर महिन्यात मुलीला जन्म दिला. नेहा लग्नाआधी प्रेग्नंट असल्याची गोष्ट अनेकांना पचनी पडली नाही आणि त्यांनी यासाठी तिला ट्रोलही केलं. लग्नाच्या 5 वर्षांनंतर दिलेल्या एका मुलाखतीत नेहाने आईवडिलांच्या प्रतिक्रियेविषयी खुलासा केला होता.
“मी लग्नाआधी गरोदर होते, म्हणून जेव्हा आम्ही त्याबद्दल माझ्या पालकांना कळवलं, तेव्हा त्यांनी मला फक्त 72 तासांचा वेळ दिला. ते म्हणाले, तुझ्याकडे लग्नासाठी फक्त 72 तास आहेत. मला अडीच दिवसांचा अवधी देण्यात आला जेणेकरून मी मुंबईला जाऊन लग्न करू शकेन. मग आम्ही मुंबईत येऊन लग्न केलं,” असं नेहाने सांगितलं होतं.
